आगामी स्थानिक स्वराज्य संस्थांच्या निवडणुका जवळ आल्या आहेत. प्रत्येक पक्षाने रणशिंग फुंकले आहेत. मुंबईसह ठाण्यातही राजकीय वारे वेगाने वाहू लागले आहेत. राज्यातील राजकारणात सध्या ठाकरे बंधू एकत्र निवडणूक लढवणार का? व्यासपीठावर जरी एकत्र आले तरीही, दोघांमध्ये राजकीय युती होणार का? हा प्रश्न सतत उपस्थित होत आहे. दरम्यान, ठाणे महानगरपालिकेत शिवसेना ठाकरे गट आणि मनसे एकत्र लढणार, अशी थेट घोषणा शिवसेना ठाकरे गटाचे खासदार संजय राऊत यांनी पत्रकार परिषदेत केली आहे.

ठाकरे बंधूंच्या युतीबाबत संजय राऊत म्हणाले, 'ठाणे महानगरपालिकेत शिवसेना ठाकरे गट आणि मनसे एकत्र निवडणूक लढवणार आहेत. ठाण्यात ठाकरे बंधू हे ठिकऱ्या उडवतील', असा थेट इशारा संजय राऊत यांनी दिला आहे. 'दोन भाऊ एकत्र निवडणूक लढवतील. तेव्हा त्यांची ताकद दिसेल. दोन्ही भावांचं अबकी बार ७५ पार आहे', असं म्हणत संजय राऊतांनी भाजपच्या 'अब की बार ७० पारला' प्रत्युत्तर दिलं आहे.

पत्रकार परिषदेत संजय राऊत म्हणाले, 'ठाण्यात आम्ही आणि महाराष्ट्र नवनिर्माण सेना एकत्र निवडणूक लढवणार आहोत. तसेच सत्तेवर येणार आहोत. आमचा नारा हा ७५ पारचा आहे. ते जे काही म्हणतील, त्याच्यापेक्षा जास्त ५ आम्ही सांगू. दोन ठाकरे सबपे भारी होणार आहेत. दोन ठाकरे सगळ्यांच्या ठिकऱ्या करतील. जेव्हा दोन्ही भाऊ एकत्र येतील, तेव्हा आमची ताकद सर्वांनाच दिसेल', असं संजय राऊत म्हणाले.

सध्या सर्वत्र ठाकरे बंधूंची राजकीय युती कधी होईल? अधिकृतरित्या युतीची घोषणा कधी होईल? असा प्रश्न वारंवार विचारला जात आहे. मराठी भाषा अस्मितेसाठी एकाच व्यासपीठावर एकत्र आल्यानंतर दोन्ही बंधू बऱ्याचवेळी एकत्र दिसले. मात्र, अद्याप त्यांनी राजकीय युतीची घोषणा केली नाही. खासदार संजय राऊतांनी ठाणे महापालिकेच्या निवडणूक एकत्र लढवण्याची घोषणा केली. राऊत यांनी केलेल्या घोषणेनंतर राजकीय वर्तुळात अनेकांच्या भुवया उंचावल्या आहेत.