वंचित बहुजन आघाडीचे सुजात आंबेडकर यांनी राष्ट्रीय स्वयंसेवक संघावर जोरदार टीका केली आहे. राष्ट्रीय स्वयंसेवक संघ तिरंगा आणि संविधानाला मानत नाही. त्यांचा संघ पब्लिक रजिस्ट्रेशन अॅक्ट देखील मानत नसल्याचा आरोपही सुजात आंबेडकर यांनी केला. ते मुंबईतील संविधान सन्मान महासभेत बोलत होते.

वंचित बहुजन आघाडीने दरवर्षीप्रमाणे याही वर्षी २५ नोव्हेंबर रोजी मुंबईतील ऐतिहासिक शिवाजी पार्क मैदानावर 'संविधान सन्मान महासभा' आयोजित केली. या सभेत प्रंचड गर्दी झाली. या सभेत सुजात आंबेडकर यांनी थेट आरएसएसला लक्ष्य केलं.

महासभेत राष्ट्रीय स्वयंसेवक संघाला (RSS) थेट आव्हान म्हटलं की, या देशात राहायचे असेल, तर RSS ला संविधान मानावे लागेल. भाजप, RSS आणि मनुवादी शक्तींना हरवण्याची क्षमता केवळ आणि केवळ आंबेडकरवाद्यांमध्येच आहे. वंचित बहुजन आघाडी हा RSS च्या कार्यालयावर मोर्चा काढणारा पहिला राजकीय पक्ष आहे'.

शिवाजी पार्कवर कार्यकर्त्यांची प्रचंड गर्दी

मुंबईच्या शिवाजी पार्कवर २५ नोव्हेंबर रोजी आयोजित केलेल्या या 'संविधान सन्मान महासभेला' संविधानप्रेमी नागरिकांनी मोठ्या संख्येने उपस्थिती लावली आहे. शिवाजी पार्क मैदान भरून गेल्याचे दिसून आले. यावेळी सुजात आंबेडकर यांनी संविधानिक मूल्यांच्या रक्षणासाठी एकत्र येण्याचे आवाहन केले.

सभा घेण्यामागचे कारण काय?

संविधानाचा मसुदा (Draft) तयार झाला, त्यानंतर २५ नोव्हेंबर रोजी डॉ. बाबासाहेब आंबेडकर यांचं भाषण झालं होतं. वंचित बहुजन आघाडीकडून त्या भाषणातील महत्त्वपूर्ण मुद्दे परत लोकांपर्यंत पोहोचवण्यासाठी आणि संविधानाचे महत्त्व जनमानसात रुजवण्यासाठी ही महासभा २५ नोव्हेंबरला आयोजित केली जाते. संविधान सभेचे महत्त्व टिकवून ठेवण्यासाठी दरवर्षी ही सभा आयोजित करण्याचा संकल्प वंचितने केला आहे.