मुंबई - महाराष्ट्र नागरी सेवेतील नियमान्वये तुकाराम सुपे, आयुक्त, महाराष्ट्र राज्य परीक्षा परिषद, पुणे यांना अटकेच्या दिनांकापासून निलंबित करण्यात आले आहे अशी माहिती शालेय शिक्षण मंत्री वर्षा गायकवाड यांनी दिली आहे. हा आदेश अंमलात असेल तेवढ्या कालावधीत तुकाराम सुपे यांचे मुख्यालय पुणे येथे राहील आणि त्यांना शासनाच्या पूर्वपरवानगीशिवाय मुख्यालय सोडता येणार नाही.

हे देखील पहा -

निलंबित असताना सुपे यांनी खाजगी नोकरी स्वीकारणे अथवा इतर कुठलाही व्यवसाय करणे अनुज्ञेय असणार नाही. निलंबित असताना त्यांनी खाजगी नोकरी स्वीकारल्यास किंवा व्यवसाय केल्यास ते गैरवतणुकीबाबत दोषी ठरतील आणि तदनुसार त्यांच्यावर कारवाई करण्यात येईल, असेही आदेशात म्हटले आहे.

सन 2019-20 मध्ये झालेल्या टीईटी परीक्षेमध्ये केलेल्या गैरव्यवहाराबाबत सुपे यांच्यावर फौजदारी गुन्हा दाखल करण्यात आला आहे. दाखल गुन्ह्याच्या अनुषंगाने त्यांना १६ डिसेंबर रोजी अटक करण्यात आली. सुपे यांना अटक करून ४८ तासापेक्षा अधिक कालावधी झाला असून ते अद्यापपर्यंत पोलीस कोठडीत आहेत.

Edited By - Shivani Tichkule