अंबरनाथ : राज्यात शाळा सुरू होण्याची शक्यता वर्तवली जात असून त्या पार्श्वभूमीवर अंबरनाथमध्ये पालिकेच्या वतीने शिक्षकांसाठी विशेष लसीकरण मोहीम राबवण्यात आली आहे. या मोहिमेत शिक्षकांसाठी तब्बल ७५० लसीचे डोस उपलब्ध करून देण्यात आले आहेत. (Special vaccination campaign for teachers by the municipality in Ambernath)

हे देखील पहा -

कोरोना प्रतिबंधक लसीकरण मोहीम सुरू झाल्यानंतर फ्रंन्टलाइन वर्कर, ज्येष्ठ नागरिक आणि त्यानंतर १८ वर्षांवरील सर्वांसाठी लसीकरण मोहीम सुरू करण्यात आली. मात्र यामध्ये शिक्षकांसाठी कुठलीही विशेष मोहीम सुरु करण्यात आलेली नव्हती. राज्यात येत्या काही काळात शाळा पुन्हा एकदा सुरू होण्याची शक्यता वर्तवली जातेय. या पार्श्वभूमीवर शिक्षकांना कोरोना प्रतिबंधक लस देणे गरजेचं बनलं होतं. त्यामुळे अंबरनाथ नगरपालिकेने आज शिक्षकांसाठी विशेष लसीकरण मोहीम राबवली. या मोहिमेत ऑर्डनन्स फॅक्टरी हॉस्पिटलमधील लसीकरण केंद्रावर शिक्षकांसाठी कोव्हीशिल्ड लसीचे ७५० डोस उपलब्ध करून देण्यात आले आहेत.

या लसीकरण मोहिमेला शिक्षकांनी सकाळी ९ वाजल्यापासून गर्दी केली असून अतिशय नियोजनबद्ध पद्धतीने प्रत्येक शिक्षकाची तपासणी करून त्यांना लस दिली जातेय. या लसीकरण मोहिमेनंतर लस घेतलेल्या शिक्षकांनीही समाधान व्यक्त केलं आहे.

Edited By - Akshay Baisane