विकास मिरगणे, नवी मुंबई

नवी मुंबईतून संतापजनक बातमी समोर आली आहे. कामोठे परिसरात एका खासगी शाळेच्या बसमध्ये ३ वर्षांच्या मुलीवर लैंगिक अत्याचार करण्यात आला. या प्रकरणी पोलिसांनी ३० वर्षीय बसचालकाला अटक केली असून, पनवेल न्यायालयाने आरोपीला शनिवारपर्यंत पोलीस कोठडी सुनावली आहे. या घटनेमुळे परिसरात संतापाचे वातावरण निर्माण झाले आहे. दरम्यान मुलींच्या सुरक्षिततेवर प्रश्नचिन्ह उपस्थित केला जात आहे.

पोलिसांनी दिलेल्या माहितीनुसार, आरोपी संबंधित खासगी शाळेतील विद्यार्थ्यांची ने-आण करण्यासाठी भाड्याने घेतलेल्या बसवर चालक म्हणून काम करत होता. बुधवारी दुपारी साडेबारा वाजण्याच्या सुमारास त्याने कामोठे येथील बालवाडी आणि प्राथमिक शाळेतील विद्यार्थ्यांना त्यांच्या घरी सोडण्यासाठी बसमधून प्रवास सुरू केला. विद्यार्थ्यांना त्यांच्या घरी सोडल्यानंतर संबंधित तीन वर्षांची चिमुकली काही वेळ बसमध्ये एकटी राहिली. याच दरम्यान आरोपी चालकाने तिच्यासोबत गैरवर्तन केल्याचा आरोप आहे. त्यानंतर चिमुकलीला घरी सोडण्यात आले.

घरी पोहोचल्यानंतर चिमुकलीने पोटदुखी होत असल्याची तक्रार केली. यावेळी तिने आपल्या आजीला बसमधील चालकाने तिच्यासोबत चुकीचे कृत्य केल्याचे सांगितले. चिमुकलीने सांगितलेली माहिती ऐकून कुटुंबीयांना धक्का बसला. आजीने तातडीने शाळा व्यवस्थापनाला घटनेची माहिती दिली. त्यानंतर पोलिसांत तक्रार दाखल करण्यात आली. तक्रार मिळताच पोलिसांनी प्रकरणाची गंभीर दखल घेत तपास सुरू केला आणि आरोपी बसचालकाला अटक केली. चिमुकलीची वैद्यकीय तपासणी करण्यात आली असून, तपासणीदरम्यान लैंगिक अत्याचार झाल्याचे निष्पन्न झाल्याचे पोलिसांनी सांगितले.

या प्रकरणी आरोपीविरोधात भारतीय न्याय संहितेतील (BNS) १२ वर्षांखालील मुलीवरील बलात्कारासंदर्भातील संबंधित कलमांसह पॉक्सो कायद्यानुसार गुन्हा दाखल करण्यात आला आहे. गुरुवारी आरोपीला पनवेल न्यायालयात हजर करण्यात आले. न्यायालयाने त्याला शनिवारपर्यंत पोलीस कोठडी सुनावली आहे. दरम्यान, या प्रकरणात शाळा व्यवस्थापनाची भूमिका आणि विद्यार्थ्यांच्या सुरक्षेसंदर्भातील उपाययोजनांचीही चौकशी केली जाणार आहे. शाळा व्यवस्थापनातील संबंधित कर्मचाऱ्यांचे जबाब नोंदवण्यात येणार असून, पोलिसांकडून या प्रकरणाचा पुढील तपास सुरू आहे.