मुंबईत माणुसकीला काळिमा फासणारी घटना समोर आली आहे. नातवाने आपल्या सख्ख्या आजीला कचऱ्याच्या ढिगाऱ्यात फेकून दिलं आहे. शनिवारी सकाळी आरे कॉलीनीतील कचऱ्याच्या ढिगाऱ्यात एका दुर्बल वृद्ध महिला आढळून आली. कचऱ्यामध्ये मरण्यासन्न अवस्थेत असलेल्या या महिलेनं नातवाने फेकून दिल्याचं सांगितलं. सध्या पोलीस वृद्ध महिलेच्या कुटुंबाचा शोध घेत आहेत.

मिळालेल्या माहितीनुसार, यशोदा गायकवाड (वय वर्ष ६०) असे वृद्ध महिलेचं नाव आहे. वृद्ध महिला आपल्या नातवासोबत मालाड परिसरात राहतात. त्यांना त्वचेचा कॅन्सर आहे. आरे कॉलनीतील युनिट क्रमांक ३२ कडे जाणाऱ्या रस्त्यावर सकाळी ८:३० च्या सुमारास काहींना ही महिला कचऱ्याच्या ढिगाऱ्यात दिसली. पोलीस नियंत्रण कक्षाला मिळालेल्या माहितीनुसार, आरे पोलीस ठाण्याचे पथक घटनास्थळी पोहोचले. त्यावेळी वृद्ध महिला कचऱ्याच्या ढिगाऱ्यात मरण्यासन्न अवस्थेत दिसली.

तिने गुलाबी रंगाचा नाईटड्रेस आणि राखाडी रंगाचा पेटीकोट परिधान केला होता. तिच्या गालावर आणि नाकावर जखमा होत्या. वृद्ध महिलेला त्वचेचा कॅन्सर असल्याकारणाने तिच्या नातवानेच कचऱ्याच्या ढिगाऱ्यात फेकून दिल्याची माहिती तपासातून समोर आली. पोलिसांनी तातडीने महिलेला रूग्णालयात दाखल केलं असून, सध्या तिच्यावर रूग्णालयात उपचार सुरू आहेत.

महिलेची प्रकृती बिघडत असताना कोणतेही रूग्णालय त्यांना दाखल करण्यास नकार देत होता. ८ तासानंतर कुपर रूग्णालयात त्यांना दाखल करून घेतलं. सध्या त्या वृद्ध महिलेवर उपचार सुरू आहेत. या घटनेची माहिती पसरताच परिसरात खळबळ उडाली आहे.