पुण्यामध्ये सासऱ्याने जावयाची हत्या केल्याची धक्कादायक घटना समोर आली. पुण्यातल्या फुरसुंगीमध्ये ही घटना घडली. जावयाने सासरवाडीमध्ये येत सासरा आणि सासूला शिवीगाळ केली. यावरून दोघांमध्ये कडाक्याचे भांडण झाले. या भांडणानंतर संतप्त झालेल्या सासऱ्याने जावयाचा गळा दाबला आणि त्याला जागीच संपवलं. या घटनेमुळे पुण्यात खळबळ उडाली. या प्रकरणी पुणे पोलिसांनी आरोपीला अटक केली. पोलिस सध्या तपास करत आहेत.

मिळालेल्या माहितीनुसार, पुण्यातील फुरसुंगीमध्ये राहणाऱ्या एका व्यक्तीची सासऱ्याने गळा आवळून हत्या केली. सासऱ्याने गमजाने जावयाचा गळा आवळून आणि डोके फरशीवर आपटून हत्या केली. या घटनेमुळे फुरसुंगी परिसरात खळबळ उडाली. फुरसुंगी पोलिसांनी आरोपी सासऱ्याला अटक केली असून त्याच्यावर हत्येचा गुन्हा दाखल करण्यात आला आहे. ही घटना रविवारी रात्री साडेनऊ वाजता वडकी येथील कैलासनगरमधील वलवावस्ती येथे घडली.

पोलिसांनी सांगितले की, प्रशांत सुरेश जमदाडेने (वय ३५ वर्षे) दारूच्या नशेत येऊन सासू-सासऱ्याला शिवीगाळ केली. वाद विकोपाला गेल्यानंतर प्रशांत आणि सासरा सुरेश जमदाडे यांच्यात जोरदार भांडण झाले आणि त्यानंतर हाणामारी झाली. या हाणामारीत सासऱ्याने कापडी गमजाने प्रशांतचा गळा आवळून डोके फरशीवर आपटले. या हाणामारीत तो गंभीर जखमी झाला.

सासऱ्याने केलेल्या हल्ल्यात प्रशांत जमदाडे गंभीर जखमी झाला. जास्त रक्तस्राव झाल्यामुळे प्रशांतचा जागीच मृत्यू झाला. या घटनेची माहिती मिळताच पोलिसांनी घटनास्थळी धाव घेतली आणि मृतदेह ताब्यात घेऊन शवविच्छेदनासाठी रुग्णालयात पाठवला. याप्रकरणी फुरसुंगी पोलिसांनी सासरा सुरेश बाबूराव जमदाडे (वय ५९ वर्षे) याच्याविरोधात गुन्हा दाखल करत त्याला अटक केली. पोलिस सध्या या प्रकरणाचा अधिक तपास करत आहेत.