मुंबईतील मालाडमधून एक धक्कादायक बातमी समोर येत आहे. एका ८ वर्षांच्या चिमुकलीवर फावड्याने हल्ला करण्यात आला. या प्रकरणी पोलिसांना माहिती देण्यात आली. पोलिसांनी आरोपीला ताब्यात घेतलं. मात्र, नंतर त्यांनी आरोपीला नोटीस देऊन सोडून दिले. दरम्यान, मनसेच्या दणक्यानंतर मुलीवर हल्ला करणाऱ्या आरोपीला मालाड पोलिसांनी ताब्यात घेतलं.

मिळालेल्या माहितीनुसार, मालाड परिसरात ८ वर्षांच्या मुलीवर फावड्याने हल्ला कऱण्यात आला. आरोपी मुलीवर फावड्याने हल्ला केल्यानंतर फरार झाला. अजय यादव (वय ३४) असे आरोपीचे नाव असून, पोलिसांनी तपास करून आरोपीला बेड्या ठोकल्या. सुरूवातीला पोलिसांनी आरोपीला नोटीस देऊन सोडून दिले.

मात्र, या निष्काळजीपणाविरोधात मनसे आक्रमक झाली. विभाग प्रमुख दिनेश साळवी यांच्या नेतृत्वाखाली कार्यकर्ते पोलिस ठाण्यात दाखल झाले. मनसेनं पोलिसांना आरोपीला तात्काळ अटक करण्याची मागणी केली. नंतर पोलिसांनी पुन्हा कारवाई करून आरोपीला ताब्यात घेतलं.

दिनेश साळवी यांनी सांगितले की, “८ वर्षांच्या मुलीवर फावड्याने हल्ला करणाऱ्या आरोपीला आधी केवळ नोटीस देऊन सोडण्यात आले होते. पण आता पोलिसांनी आरोपीला अटक केली असून त्याच्यावर कलम ११८ भाग २ अंतर्गत गुन्हा दाखल करण्यात आला आहे.” या घटनेनंतर मालाड परिसरात खळबळ उडाली असून, पुढील तपास पोलिसांकडून सुरू आहे.