‘सकाळ करंडक’ आंतरमहाविद्यालयीन एकांकिका स्पर्धेच्या मुंबई विभागीय अंतिम फेरीत उद्या (ता. ८) तरुणाई त्यांचे नाट्यविष्कार सादर करणार आहेत. माटुंगा येथील यशवंत नाट्यमंदिरात होणाऱ्या या स्पर्धेच्या निमित्ताने ज्येष्ठ अभिनेते सचिन पिळगावकर आणि सुविख्यात अभिनेत्री मधुराणी गोखले सायंकाळी ५.३० वाजता संवाद साधणार आहेत. सकाळी ९ वाजतापासून स्पर्धेला सुरुवात होणार असून, नाट्यरसिकांना प्रवेश नि:शुल्क आहे.

मुंबई विभागीय अंतिम फेरीत एकूण आठ एकांकिका सादर होणार आहेत. त्यातून सर्वोत्कृष्ट पहिल्या क्रमांकाची एकांकिका पुणे येथे हाणाऱ्या महाअंतिम फेरीसाठी निवडली जाईल, असे आयोजकांच्या वतीने कळवण्यात आले आहे. स्पर्धेचा बक्षीस वितरण समारंभ ज्येष्ठ अभिनेते सचिन पिळगावकर आणि अभिनेत्री मधुराणी गोखले यांच्या प्रमुख उपस्थितीत होणार आहे. पारितोषिक वितरण समारंभापूर्वी त्यांची मुलाखत नाट्यरसिक आणि विद्यार्थी कलावंतांसाठी विशेष आकर्षण असेल. या स्पर्धेचे सहप्रायोजक रिलायन्स डिजिटल आहे.

महाविद्यालयीन रंगभूमी ही मराठी नाट्यविश्वाची खरी प्रयोगशाळा मानली जाते. याच रंगभूमीवरून अनेक कलावंतांनी व्यावसायिक नाट्य, चित्रपट आणि मालिकांच्या विश्वात यशस्वी वाटचाल केली आहे. त्या परंपरेला नवी ऊर्जा देण्याचे काम गेल्या काही वर्षांत ‘सकाळ करंडक’ सातत्याने करत आहे. केवळ स्पर्धा म्हणून नव्हे, तर नव्या पिढीतील कलागुणांना दिशा देणारे, सर्जनशीलतेला व्यासपीठ उपलब्ध करून देणारे आणि दर्जेदार एकांकिकांच्या निर्मितीला प्रोत्साहन देणारे व्यासपीठ म्हणून या स्पर्धेने स्वतःची वेगळी ओळख निर्माण केली आहे.

मुंबईत सादर होणाऱ्या एकांकिका

वेळ : महाविद्यालय : एकांकिका

सकाळी ९ वा. : सिडेनहॅम महाविद्यालय : यात्रा

सकाळी १० वा. : सतीश प्रधान ज्ञानसाधना कॉलेज : खोटं बोल नाऱ्या

सकाळी ११ वा. : आर. ए. पोद्दार कॉलेज : मालिक

सकाळी १२ वा. : डॉ. टी. के. टोपे रात्र महाविद्यालय : जिलेबी

दुपारी १.३० वा. : चेतना कॉलेज : मॅरेथॉन

दुपारी २.३० वा. : विद्यालंकार कॉलेज : शुभमंगल सावधान

दुपारी ३.३० वा. : कीर्ती कॉलेज : हर हर गंगे

दुपारी ४.३० वा. : महात्मा फुले महाविद्यालय : अर्जूनाचं झाड

सायंकाळी ५.३० वा : सचिन पिळगावकर आणि मधुराणी गोखले यांची मुलाखत

सायंकाळी ६ वाजता : बक्षीस वितरण