सचिन गाड, साम टीव्ही प्रतिनिधी

मुंबई : मुंबईतील माहीम विधानसभा मतदारसंघाची राजकीय वर्तुळात जोरदार चर्चा सुरु आहे. माहीम विधानसभा मतदारसंघात तिरंगी लढत पाहायला मिळत आहे. माहीम विधानसभा मतदारसंघात मनसेकडून महायुतीचे उमेदवार सदा सरवणकर यांना उमेदवारी मागे घेण्याची विनंती केली जात आहे. यासाठी मनसे नेते आणि शिंदे गटाच्या नेत्यांच्या भेटीगाठी झाल्याचं सांगितलं जात आहे. यानंतर मी उमेदवारी मागे घेण्यास तयार आहे. पण मनसेने महायुतीविरोधातील उमेदवार मागे घ्यावे, अशी अट सदा सरवणकर यांनी ठेवली आहे.

माहीम विधानसभा मतदारसंघातील महायुतीचे उमेदवार सदा सरवणकर यांनी मनसेवर भाष्य केलं आहे. सदा सरवणकर म्हणाले, 'मी त्याग करायला तयार आहे. एकनाथ शिंदे यांना पुन्हा मुख्यमंत्री बनवणे महत्वाचे आहे. मनसेने सगळ्याच ठिकाणी महायुती विरोधातील उमेदवार उभे केले आहे. ते त्यांनी मागे घ्यावे. त्यांनी उमेदवारी मागे घेतल्यास मी पक्षासाठी उमेदवारी मागे घेण्यास तयार आहे. एकनाथ शिंदे पुन्हा मुख्यमंत्री व्हावेत, त्यासाठी महायुतीचे जास्तीत जास्त आमदार निवडून आले पाहिजेत'.

'मनसे आमच्या विरोधात उमेदवार देत असतील तर त्यांनी सहकार्याची अपेक्षा करू नये. आम्हाला ठाकरे कुटुंबाचा आदर आहे. सगळीकडे आमच्या विरोधात उमेदवार उभे करायचे. त्यानंतर इकडे सहकार्य मागायचं ही भूमिका योग्य नाही. आमचा एक आमदार वाढणं महत्वाचं आहे. भाजप देखील आमच्यासोबत येतील. युतीचा धर्म पाळावा लागेल असं उपमुख्यमंत्री म्हणाले आहेत, असे सदा सरवणकर पुढे म्हणाले.

महेश सावंत यांच्या मुख्य निवडणूक कार्यालयाचं उद्घाटन

माहीमचे ठाकरे गटाचे उमेदवार महेश सावंत यांच्या मुख्य निवडणूक कार्यालय विभागातील शितलादेवी मंदिराजवळ कार्यालय थाटण्यात आलं आहे. खासदार अनिल देसाई यांच्या हस्ते उद्घाटन होणार आहे. या कार्यक्रमाला खासदार वर्षा गायकवाड देखील उपस्थित झाल्या आहेत. माहीमच्या शितलादेवी मंदिराजवळ महेश सावंत यांचं मुख्य निवडणूक कार्यालय आहे.