संघर्ष गांगुर्डे, साम टीव्ही

डोंबिवलीमध्ये रिपब्लिकन पार्टी ऑफ इंडिया (आठवले गट) मधील अंतर्गत वाद आता चांगलाच चिघळला असून त्याचे पडसाद थेट रस्त्यावर आणि पोलीस ठाण्यात उमटले आहेत. पक्षातीलच एका पदाधिकाऱ्याला मारहाण केल्याप्रकरणी युवक जिल्हाध्यक्ष जय जाधव यांच्यासह चार जणांविरोधात विष्णूनगर पोलीस ठाण्यात गुन्हा दाखल करण्यात आला आहे.

मिळालेल्या माहितीनुसार, पक्षातील पदाधिकारी विकास खैरनार यांनी याप्रकरणी तक्रार दाखल केली आहे. कर्वे रोड परिसरात दोन दुचाकींवरून आलेल्या आरोपींनी खैरनार यांची गाडी अडवून त्यांना मारहाण केली आणि जीवे मारण्याची धमकी दिली, असा आरोप तक्रारीत करण्यात आला आहे. या प्रकरणात पोलिसांनी जय जाधव, संदीप पाईकराव, नितीन इंगोले आणि डॉ. सुभाष अंभोरे यांच्याविरोधात गुन्हा नोंदवला असून अधिक तपास सुरू केला आहे.

काही दिवसांपूर्वीच डॉ. सुभाष अंभोरे यांनी विकास खैरनार यांच्याविरोधात मारहाण आणि अपहरणाचा गुन्हा दाखल केला होता. त्या प्रकरणात खैरनार यांना अटकही झाली होती आणि नंतर त्यांची जामिनावर सुटका झाली.

सूत्रांच्या माहितीनुसार, पक्षातील पदनियुक्तीवरूनच हा वाद पेटला असून, गटबाजीमुळे परिस्थिती अधिकच बिघडली आहे. सध्या दोन्ही बाजूंनी एकमेकांवर गंभीर आरोप-प्रत्यारोप सुरू असून, हा अंतर्गत संघर्ष आता उघडपणे रस्त्यावर उतरल्याचे चित्र दिसत आहे. पोलिस तपासातून नेमके काय घडले याचा उलगडा होण्याची शक्यता आहे.