पुण्यातून धक्कादायक घटना समोर आली आहे. बांधकाम व्यावसायिकाकडून फसवणूक झाल्याने सेवानिवृत्त अधिकार्‍याने पुण्यातील बाणेरमध्ये आत्महत्या केल्याची धक्कादायक घटना उघडकीस आली आहे. सेवानिवृत्त अधिकाऱ्याच्या आत्महत्येनंतर फसवणूक आणि आत्महत्येस प्रवृत्त केल्याप्रकरणी बिल्डरविरोधात गुन्हा दाखल करण्यात आला आहे.

पुण्यातील बाणेर परिसरात राहणाऱ्या सेवानिवृत्त अधिकाऱ्याने टोकाचं पाऊल उचललं. नरेश उमाकांत महाजन असे आत्महत्या केलेल्या सेवानिवृत्त अधिकाऱ्याचे नाव आहे. महाजन महावितरण कंपनीमधून सेवानिवृत्त झाले होते. महाजन यांनी त्यांची जमीन बिल्डरला विकसित करण्यासाठी दिली होती.

करारानुसार महाजन यांना सदनिका देणे बंधनकारक होते. मात्र या बिल्डरने दिर्घकाळ टाळाटाळ केल्याने महाजन यांना नैराश्य आले. त्यामुळे आत्महत्या करत असल्याचं महाजन यांनी लिहिलेल्या शेवटच्या चिठ्ठीमध्ये म्हटलं आहे. बिल्डरने विकसित करण्यासाठी दिलेल्या जागेवर अर्धवट बांधलेल्या इमारतीच्या सातव्या मजल्यावरुन उडी मारून महाजन यांनी आत्महत्या केली. महाजन यांच्या आत्महत्येनंतर त्यांच्या कुटुंबीयांनी बिल्डरला अटक करण्याची मागणी केली आहे. याबाबत अधिक तपास बाणेर पोलिस करत आहेत.

त्या दिवशी नेमकं काय घडलं?

तत्पूर्वी, महाजन यांनी दिलेल्या जागेवर सात मजली इमारत उभी राहून बांधकाम पूर्णत्वास आलं आहे. महाजन हे १६ फेब्रुवारी रोजी प्रोजेक्टच्या ठिकाणी पोहोचले. त्यानंतर त्यांनी सदनिकेबाबत बिल्डरला विचारणा केली. बिल्डरशी चर्चा करताना त्यांनी धमकी दिल्याचा आरोप आहे. या वादावादीनंतर महाजन यांनी इमारतीवरून उडी घेत आत्महत्या केल्याचे पोलिसांनी सांगितलं.