मराठी मुद्द्यांसाठी दोन्ही बंधू एकत्र आले. राजकारणात काही होऊ शकतं. आगामी काळात एकनाथ शिंदे देखील ठाकरे यांच्यासोबत जातील, असा दावा पुण्यातील माजी आमदार शिंदे गटाचे नेते रविंद्र धंगेकर यांनी केला आहे. रविंद्र धंगेकर यांच्या दाव्याने राजकीय वर्तुळात खळबळ उडाली आहे.

मराठी भाषेच्या मुद्यावरून ठाकरे बंधू एकवटले. मुंबईतील विजयी मेळाव्यात ठाकरे बंधूंनी सरकारवर जोरदार निशाणा साधला. दोन्ही ठाकरे एकत्र आल्याने राज्यातील राजकीय समीकरण बदललं आहे. त्यामुळे येत्या महापालिका निवडणुकीत त्याचा परिणाम पाहायला मिळणार आहे. दोन्ही बंधू एकत्र येण्याची चर्चा राजकीय वर्तुळात सुरु असताना, काँग्रेसमधून शिंदे गटात गेलेल्या रविंद्र धंगेकर यांनी एका वृत्त वाहिनीशी बोलताना मोठा राजकीय दावा केला.

रविंद्र धंगेकर नेमकं काय म्हणाले?

रविंद्र धंगेकर म्हणाले, 'राज आणि उद्धव ठाकरे यांची रक्ताची नाती आहेत. रक्ताची नाती एकत्र आली. दोन भाऊ एकत्र आल्याचं सर्वांना आवडलं. मलाही आवडलं. दोन्ही एकत्र भाऊ एकत्र आल्याने कोणाला वाईट वाटेल. मराठी माणसे एकत्र येत आहेत'.

'आजच्या मेळाव्याला राजकीय भूमिका नव्हती. आज फक्त मराठी माणसाची भूमिका होती. मराठी माणसासाठी एकत्र येण्याच्या भूमिकेचं स्वागत केलं पाहिजे. अनेकांनी त्यांना एकत्र आणण्यासाठी प्रयत्न केले. भविष्यात एकनाथ शिंदेही एकत्र येऊ शकतात. राजकारणात काहीही होऊ शकतात, असे ते पुढे म्हणाले.

रविंद्र धंगेकर यांच्या दाव्याने राजकीय वर्तुळात उलटसुलट चर्चा सुरु झाली आहे. धंगेकर यांच्या दाव्याने अनेक राजकीय नेत्यांच्या भुवया उंचावल्या आहेत. धंगेकर यांच्या दाव्यानंतर ठाकरे गट आणि मनसेकडून काय प्रतिक्रिया दिली जाते, हे पाहावे लागेल.