हिंदी सक्तीच्या मुद्द्यावर ठाकरे बंधूंनी सरकारविरोधात रणशिंग फुंकलंय. हिंदी सक्ती विरोधात राज ठाकरे आणि उद्धव ठाकरे एकच सूर आळवत असेल तरी दोन्ही पक्षांनी आंदोलनाच्या तारखा मात्र वेगवेगळ्या जाहीर केल्या आहेत.

राज्यात पहिलीपासून त्रिभाषिक सुत्रानुसार हिंदी सक्ती करण्यात आली. त्याला मनसे आणि ठाकरे गटाने विरोध केलाय. तर आता पावसाळी अधिवेशनाच्या आधी 5 जुलै रोजी राज ठाकरेंनी हिंदीसक्तीविरोधात मोर्चाचं तर 7 जूलै रोजी ठाकरे गटाने आंदोलन करण्याचा इशारा दिलाय. मात्र मुख्यमंत्री फडणवीसांनी हिंदीसक्तीच्या मुद्द्यावरुन उद्धव ठाकरेंना टोला लगावलाय.

विधानसभा निवडणुकीनंतर राज ठाकरेंनी महाराष्ट्राच्या हितासाठी सगळे मतभेद विसरण्यास तयार असल्याचं वक्तव्य केलं होतं.. तर राज ठाकरेंना उद्धव ठाकरेंनी सकारात्मक प्रतिसाद दिला... मुख्यमंत्री फडणवीस आणि राज ठाकरेंच्या भेटीनंतर युतीच्या चर्चांना ब्रेक लागला होता.. आता मात्र दोन्ही पक्षांचं हिंदीसक्तीला विरोध या मुद्द्यावर एकमत झालंय. तर राज ठाकरेंनीही उद्धव ठाकरेंना आंदोलनासाठी आमंत्रण देणार अशी भूमिका घेतलीय. त्यामुळे उद्धव ठाकरे राज ठाकरेंनी आयोजित केलेल्या मोर्चाला हजेरी लावणार की दोन आंदोलनाच्या माध्यमातून ठाकरे बंधूंचे मार्ग वेगवेगळे होणार? याकडे राज्याचं लक्ष लागलंय.