रायगड : जिल्ह्यातील पाली शहरातील मुख्य रस्त्यावर काळजाचा ठोका चुकवणारा अपघात झाला आहे. भरधाव वेगात येणाऱ्या एका कारने दुचाकीस्वासह दोन शाळकरी मुलींना जोरदार धडक दिली. अंगाचा थरकाप उडवणारी ही घटना परिसरातील सीसीटीव्ही कॅमेऱ्यात कैद झाली आहे.  (Latest Marathi News)

सुदैवाने या अपघातात कुठलीही जीवितहानी झाली नसून दुचाकीस्वारासह दोन मुलींना किरकोळ मार लाला आहे. या थरारक घटनेचा व्हिडीओ देखील समोर आला आहे. व्हिडीओमध्ये (Viral Video)  तुम्ही पाहू शकता की दोन शाळकरी मुली रस्त्याच्या कडेनं जात आहेत.

त्यानंतर एक दुचाकीस्वार आपली दुचाकी घेऊन रस्ता ओलांडताना दिसत आहे. यादरम्यान, समोरुन भरधाव वेगात येणारी एक कार शाळकरी मुलींसह या दुचाकीस्वाराला जोराची धडक देते. धडक बसताच, मुली रस्त्याच्या बाजूला फेकल्या जातात.

तर कार दुचाकीस्वाराला पाच ते दहा फूट फरफटत नेते. नशीब बलवंत्तर म्हणून हा दुचाकीस्वार कारच्या चाकाखाली येण्यापासून थोडक्यात बचावतो. काळजाचा ठोका चुकवणारा हा अपघात CCTV मध्ये कैद झाला आहे. वाहतुकीचे नियम तोडत कार वनवेमध्ये घुसून हा अपघात झाला.

Edited By - Satish Daud