पुणेकरांसाठी महत्त्वाची बातमी आहे. पुणे शहराच्या निम्म्या भागाचा पाणीपुरवठा शुक्रवारी बंद राहणार आहे. १६ ऑगस्ट रोजी पुण्यातील अनेक भागातील पाणीपुरवठा बंद करण्यात येणार आहे. त्यामुळे पुणेकरांनी पाण्याचा गैरवापर करु नये, पाणी साठवून ठेवावे, असे आवाहन केले जात आहे.

पुणे शहरातील ससून रुग्णालय परिसरातील पाण्याची मुख्य वाहिनी फुटली आहे. पाण्याची मुख्य वाहिनी फुटल्याने मोठ्या प्रमाणात पाणी गळती झाली आहे. त्यामुळे खूप जास्त पाणी वाया गेले आहे. याच जलवाहिनी दुरुस्तीचे काम शुक्रवारी करण्यात येणार आहे. त्यामुळेच शुक्रवारी पुणे शहरातील निम्म्याहून अधिक भागात पाणीपुरवठा पूर्णपणे बंद राहणार आहे. तर शनिवारी कमी दाबाने पाणीपुरवठा केला जाणार आहे. त्यामुळे पुणेकरांनी पाणी साठवून ठेवावे.

या ठिकाणी राहणार पाणीपुरवठा बंद

पुणे स्टेशन, मंगळवार पेठ, स्वारगेट, ससून रुग्णालय परिसर, सोमवार पेठ, मंगळवार पेठ, संचेत हॉस्पिल परिसर, सांगमवडी परिसर या भागात शुक्रवारी पाणीपुरवठा पूर्णपणे बंद राहणार आहे. तर शनिवारी खूप कमी प्रमाणात पाणीपुरवठा करण्यात येणार आहे. त्यामुळे पुणेकरांनी आधीच खबरदारी घ्यायला हवी.

पुणे शहरातील धरणांमधील पाणीसाठा

पुणे शहरात जुलै महिन्यात जोरदार पाऊस झाला. त्यामुळे पुणे शहराला पाणीपुरवठा करणाऱ्या धरणांमधील पाणीसाठ्यात वाढ झाली आहे. पुण्यातील चारही धरणांमध्ये ९३.११ टक्के पाणीसाठा आहे.त्यामुळे पुणेकरांच्या पाण्यांची चिंता मिटली आहे. टेमघर धरण १०० टक्के भरले आहे. तर खडकवासला धरणात ८२.१३ टक्के पाणीसाठा आहे. पानशेत धरणात ९३.३७ टक्के तर वरसगाव धरणात ९२.५९ टक्के पाणीसाठा जमा आहे.