सागर आव्हाड, साम प्रतिनिधी

पुणे - सातारा महामार्गावरील खेड शिवापूर टोल नाक्यावर कर्तव्य बजावणाऱ्या वाहतूक पोलिसांवर हल्ला झाला आहे. प्रशांत राऊत असे पोलीस हवालदाराचे नाव आहे. प्रशांत राऊत हे राजगड पोलीस ठाण्यात वाहतूक शाखेत हवालदार पदावर कार्यरत आहेत. दरम्यान खेड शिवापूर टोल नाक्यावर झालेल्या हल्ल्यात प्रशांत राऊत जखमी झाले असून त्यांच्यावर खाजगी रुग्णालयात उपचार सुरू आहेत.

या हल्ल्याप्रकरणी एका आरोपीला पोलिसांनी ताब्यात घेतले असून दुसरा आरोपी फरार आहे. खेड शिवापूर टोल नाक्यावर हवालदार प्रशांत राऊत कर्तव्य बजावत होते, त्यावेळी काही व्यक्तींशी त्यांचा वाद झाला. त्यानंतर प्रशांत राऊत यांच्यावर हल्ला करण्यात आला. नया हल्ल्यात त्यांना दुखापत झाली.घटनेनंतर त्यांना उपचारासाठी खाजगी रुग्णालयात दाखल करण्यात आले होते.

या घटनेची माहिती मिळताच पोलिसांनी तपास करत एका संशयिताला ताब्यात घेतले आहे. तर दुसरा एक आरोपी अद्याप फरार असून पोलीस त्याचा शोध घेत आहेत. परिसरातील सीसीटीव्ही फुटेज तसेच अन्य पुराव्यांच्या आधारे पोलीस तपास करत आहेत. या प्रकरणाचा अधिक तपास राजगड पोलीस ठाणे करत आहे.