Devendra Fadnavis action on Pune toxic liquor case : विषारी दारूमुळे पुणे आणि पिंपरी चिंचवडमध्ये १२ जणांचा मृत्यू झाला आहे. या प्रकरणी पोलिसांकडून मोठी कारवाई केली जात आहे. मुख्य आरोपीसह पोलिसांनी आतापर्यंत ८ जणांना बेड्या ठोकल्या आहेत. या प्रकरणाची दखल थेट मुख्यमंत्री, गृहमंत्री देवेंद्र फडणवीसय यांनी घेतली आहे. हे मृत्यू नसून हत्याच असल्याचे सांगत देवेंद्र फडणवीस यांनी आरोपींवर कठोर कारवाई करण्याचे आदेश दिले आहेत. त्याशिवाय या प्रकरणात कोणतीही हयगय करू नका.. कुणाचाही हात असो तपास कठोर करा, अशा सूचना त्यांनी दिल्या आहेत.

मागील ४८ तासांत पुणे जिल्ह्यात मृत्यूचे तांडव सुरू आहे. विषारी दारूमुळे हाहाकार माजलाय. पिंपरी चिंचवडमध्ये ७ तर पुण्यात ५ जण दगावल्याने एकच खळबळ उडाली आहे. पोलिसांनीही या प्रकरणाची पाळमुळं खणून काढण्यासाठी रात्रीपासूनच तपास सुरू केला आहे. राज्याला हादरवणाऱ्या या घटनेनंतर मुख्यमंत्री देवेंद्र फडणवीस ॲक्शन मोडवर आले आहेत. फडणवीस यांनी थेट पोलीस आयुक्तांशी संपर्क साधून कठोर कारवाई करण्याचे आदेशच दिले आहेत. हयगय करू नका. एकही आरोपी सुटला नाही पाहिजे, असे थेट आदेश त्यांनी दिले आहेत.

ही घटना अत्यंत संवेदनशील आणि गंभीर आहे. याप्रकरणी माझे पुणे व पिंपरी-चिंचवड दोन्ही पोलीस आयुक्तांशी बोलणे झाले आहे. दारू कुठे तयार झाली याचा छडा पोलिसांनी लावला असून मुख्य आरोपींसह आतापर्यंत ८ जणांना अटक करण्यात आली आहे. या गुन्ह्यामागे असणारी संपूर्ण साखळी (Ecosystem) शोधून काढण्याचे काम सुरू आहे. यामध्ये आणखी काही लोकांचा समावेश असण्याची शक्यता असून पोलीस व उत्पादन शुल्क विभाग (Excise Department) संयुक्तपणे कारवाई करत आहेत अशी माहिती देवेंद्र फडणवीस यांनी दिली.

हा प्रकार म्हणजे एक प्रकारे 'हत्याच' असल्यामुळे आरोपींवर अतिशय कठोर कलमे लावण्यात आली आहेत. यामध्ये कोणाचीही गय केली जाणार नाही आणि या रॅकेटच्या मुळापर्यंत जाऊन ते पूर्णपणे संपवले जाईल. सध्या जे लोक गंभीर (Serious) आहेत, त्यांना योग्य ती वैद्यकीय मदत देऊन त्यांचे प्राण वाचवण्याचे शर्थीचे प्रयत्न सुरू आहेत, असे मुख्यमंत्री म्हणाले. प्राथमिक माहितीनुसार, ही दारू तयार करण्यासाठी 'मिथेनॉल' (Methanol) सारख्या घातक केमिकल प्रॉडक्टचा वापर करण्यात आल्याचे समोर येत आहे, मात्र पोलीस यावर अधिकृतपणे सविस्तर माहिती देतील, असे त्यांनी सांगितले.

पिंपरीत ७ जणांचा मृत्यू

पिंपरी चिंचवड शहरात विषारी दारू प्राशन केल्याने आतापर्यंत सात जणांचा मृत्यू झाल्याची माहिती पोलिसांनी दिली आहे. तर तीन जणांचे प्रकृती चिंताजनक आहे अशी अधिकृत माहिती पिंपरी-चचवड शहर पोलिसांच्या वतीने देण्यात आली आहे. यामध्ये मृतांचा आकडा अजून वाढण्याची शक्यता आहे. मृत व्यक्तींचे विसेरा हे फॉरेन्सिक रिपोर्ट साठी राखून ठेवण्यात आले आहेत. तसेच तपास करण्यासाठी फॉरेन्सिक पथक घटनास्थळी बोलवण्यात आलं आहे. आणि विषारी दारू विकणाऱ्या पाच - सहा आरोपींना पोलिसांनी ताब्यात घेतल असून त्यांच्याकडे पुढील तपास करण्यात येत आहे अशी माहिती पिंपरी चिंचवड शहर पोलिसांच्या वतीने देण्यात आली आहे.