अक्षय बडवे साम प्रतिनिधी

Pune Traffic : पुणे शहराचा चहूबाजूंनी विस्तार होत आहे. विस्तारासह पुण्यात वाहतूक कोंडीचा प्रश्न देखील दिवसेंदिवस गंभीर बनत आहे. एका आंतरराष्ट्रीय सर्वेक्षण अहवालानुसार, पुण्यात १० किलोमीटर अंतर पार करण्यासाठी ३३ मिनिटे आणि २२ सेकंद लागतात. यावरुन पुणेकरांसाठी वाहतूक कोंडीची समस्या किती गंभीर बनली आहे याचा अंदाज येतो. पण पुण्यात ही समस्या का वाढत आहे, जाणून घ्या..

‘टॉम-टॉम’ या डॅनिश संस्थेने जगभरातील विविध देशांतील मोठ्या शहरांमधील वाहतूक कोंडीचे सर्वेक्षण करण्याचे काम करते. या संस्थेने मागच्या वर्षी म्हणजेच २०२४ मध्ये जगभरातील वाहतूक कोंडीने ग्रासलेल्या शहरांची नावे शोधण्यासाठी संबंधित शहरांमध्ये १० किलोमीटरचा प्रवास करण्यासाठी किती वेळ लागतो असे सर्वेक्षण केले होते. या सर्वेक्षणाच्या यादीत पुणे शहर तिसऱ्या क्रमांकावर आहे. मेट्रोचे विस्तारीकरण, उड्डाणपुलांची कामे, रस्त्यावरील खड्डे यांसारख्या अनेक कारणांमुळे पुण्यात वाहतूक कोंडीचे प्रमाण वाढत आहे.

जगातील शहरांत १० किलोमीटर अंतरासाठी लागणारा वेळ -

१. बरानकिला (कोलंबिया) : ३५ मिनिटे, ६ सेकंद

२. कोलकाता (भारत) : ३४ मिनिटे, ३३ सेकंद

३. बंगळुरु (भारत) : ३4 मिनिटे, १० सेकंद

४. पुणे (भारत) : ३३ मिनिटे, २२ सेकंद

५. लंडन (इंग्लंड) : ३३ मिनिटे, १७ सेकंद

पुण्यातील वाहतूक कोंडीमागे काय कारण आहे आणि त्यावर काय उपाय करता येऊ शकतात यावर वाहतूक तज्ज्ञांनी त्यांची मतं मांडली आहेत.

परिसर संस्थेचे संचालक रणजित गाडगीळ यांच्या मते, वाहतुकीच्या धोरणाला प्राधान्य देणे गरजेचे आहे. सार्वजनिक वाहतुकीचा वापर विशेषत: शहरातील बससेवा यांच्या संख्येत वाढ करणे आवश्यक आहे. खासगी वाहनांची संख्या कमी करुन सार्वजनिक वाहतूक वाढवायला हवी. वाहतूक धोरणांची अंमलबजावणी करण्यासाठी राज्यकर्त्यांनी विचार करणे गरजेचे आहे.

वाहतूक तज्ज्ञ प्रांजली देशपांडे यांनी देखील वाहतूक कोंडीचे प्रमुख कारण खासगी वाहनांची वाढती संख्या आहे असे म्हटले आहे. त्यांच्या मते, पुणे शहरातील रस्त्यांची रुंदी वाढवणे, फुटपाथची डागडुजी करणे, सार्वजनिक वाहतूक वाढवणे, टाऊन प्लॅनिंग करणे, मेट्रोचे जाळे वाढवणे अशा गोष्टी राबवल्याने वाहतूकीचा भार कमी होईल अशी अपेक्षा आहे.