अक्षय बडवे, साम टिव्ही

पुण्यातून एक भयंकर घटना समोर आली आहे. डिजिटल होम अरेस्टच्या नावाखाली सायबर चोरट्यांनी एका ज्येष्ठ नागरिकाची फसवणूक केलीये. तब्बल १ कोटी १९ लाख रूपये लुबाडले. या घटनेचा मानसिक आणि आर्थिक धक्का बसल्यानं संबंधित वृद्ध व्यक्तीचा ह्रदयविकाराच्या झटक्यानं मृत्यू झाला.

या संपूर्ण प्रकरणी एका ८० वर्षीय महिलेने पुणे सायबर पोलीस ठाण्यात फिर्याद दिली आहे. फिर्यादी महिला आणि त्यांचे पती पुण्यातील टिंगरे नगर परिसरात गेल्या २५ वर्षांपासून राहत होते. त्यांना तीन मुली असून, त्या विदेशात असल्याची माहिती आहे. शासकीय सेवेतून निवृत्त झाल्यावर ते पेन्शन खात्यातून पैसे काढून ते उदरनिर्वाह चालवत होते.

ऑगस्ट महिन्यात सायबर चोरट्यांनी ज्येष्ठ नागरिकाला फोन करून कुलाबा पोलीस ठाण्यातून बोलत असल्याचं सांगितलं. एका व्यक्तीने करोडो रुपयांचा गुन्हा केला असून त्यात तुमच्या नावाने एका बँकेत खाते बनवले असून हा व्यवहार त्यातून झाले असल्याचं खोटं सांगितलं.

मानवी तस्करीमध्ये तुमचा सहभाग असल्याने तुम्हाला नोटीस पाठवणार आहोत, अशी बतावणी करत सायबर चोरट्यांनी एका दुसऱ्या नंबरवरून सी बी अधिकारी बोलत असल्याचं सांगितलं. तसेच तुम्हाला अटक होणार आहे, पण तुम्हाला जेल अरेस्ट का होम अरेस्ट पाहिजे असं विचारलं.

अटकेला घाबरुन 'होम अरेस्ट द्या', असे या ज्येष्ठ नागरिकाने सांगितलं. तेव्हा सायबर चोरट्यांनी त्यांना व्हिडिओ कॉल केला. बँक खात्याची पडताळणी करायची असल्याचे सांगत त्यांच्या बँक खात्यातून १ कोटी १९ लाख रुपये ट्रान्सफर केले. सायबर पोलिस ठाण्यात संबंधित व्यक्तीने २२ सप्टेंबर रोजी तक्रार दाखल केली. तसेच ऑनलाईन पोर्टलवर सुद्धा तक्रार दिली.

अटकेची भिती इतकी त्यांच्या मनावर होती. शिवाय तुम्ही कोणाला काही सांगितले तर, तुमच्या मुलीला त्रास होईल अशी भिती घातली होती याच भीतीने त्यांना हृदयविकाराचा झटका आला. त्यांना रुग्णालयात दाखल करण्यात आले होते, पण तिथे सुद्धा त्यांना फी भरण्यासाठी पैसे उरले नव्हते, अखेर त्यांचा मृत्यू झाला.