राज्यात आधीच गॅस टंचाई असून डोंबिवली नंतर आता पुण्यात सायबर फसवणुकीचा धक्कादायक प्रकार उघडकीस आला आहे. पुण्यातील उच्चभ्रू कोथरूड परिसरातील ज्येष्ठ नागरिकाने ऑनलाईन मागवलेली इलेक्ट्रिक शेगडी ३ लाख रुपयांना पडली असून त्यांची फसवणूक करण्यात आली आहे. याप्रकरणी कोथरूड पोलीस ठाण्यात तक्रार दाखल करण्यात आली आहे.

पुणे शहरात सध्या घरगुती गॅस सिलेंडर मिळत नसल्याने तसेच गॅस खरेदीसाठी मोठ्या रांगा असल्याने, अनेक जणं इलेक्ट्रिक शेगडीकडे वळत असल्याने मोठ्या प्रमाणावर इलेक्ट्रिक शेगडीची विक्री होते आहे. याच गोष्टीचा फायदा आता सायबर चोरटे घेऊ लागले आहेत.

पोलिसांनी दिलेल्या माहितीनुसार, गॅस मिळत नसल्याने पुण्यातील कोथरूड भागात राहणाऱ्या एका ज्येष्ठ नागरिकाने इलेक्ट्रिक शेगडी विकत घ्यायचं ठरवलं. दरम्यान, सोशल मीडियावर त्यांनी इलेक्ट्रिक शेगडीची जाहिरात बघितली. त्यांनी जाहिरातीवर असलेल्या मोबाइल क्रमांकावर संपर्क साधला. शेगडी खरेदीचे पैसे ऑनलाइन पद्धतीने पाठवावे लागतील असं त्यांना सांगण्यात आलं.

फोनवर सायबर चोरट्यांनी त्यांच्या बँक खात्याची पूर्ण माहिती घेतली. या माहितीचा दुरुपयोग करून चोरट्यांनी ज्येष्ठ नागरिकाच्या बँक खात्यातून ३ लाख १० हजार रुपये दुसऱ्या खात्यात हस्तांतरित केले. आपली फसवणूक झाल्याचं लक्षात आल्यानंतर ज्येष्ठ नागरिकाने पोलिस ठाणे गाठले आणि फिर्याद दिली. याप्रकरणानंतर पोलिसांनी नागरिकांना सतर्क राहण्याचे आवाहन केले आहे.