Summary -

• खराडी रेव्ह पार्टीत पोलिसांनी ४१ लाखांचा मुद्देमाल केला जप्त.

• याप्रकरणी ७ जणांना अटक करण्यात आली.

• कोकेन, गांजा, दारू, हुक्का, मोबाईल आणि कार पोलिसांनी जप्त केले.

• प्रांजल खेवलकर यांच्यासह सातही आरोपींची नावे उघड झालीत.

अक्षय बडवे, पुणे

पुण्यातील रेव्ह पार्टीसंदर्भात मोठी अपडेट समोर आली आहे. या प्रकरणी पोलिसांनी तब्बल ४१ लाखांचा मुद्देमाल जप्त केला आहे. कोकेन, गांजा, दारू- बियरच्या बॉटल्स, हुक्का आणि कार हे सर्व पोलिसांनी घटनास्थळावरून जप्त केले आहे. या प्रकरणी पोलिसांनी सातही जणांविरोधात गुन्हा दाखल करत त्यांना अटक केली. या सातही आरोपींची नावं समोर आली आहे. पुण्याचे पोलिस उपआयुक्त निखिल पिंगळे यांनी नुकताच पत्रकार परिषद घेत ही माहिती दिली.

पोलिस उपआयुक्तांनी सांगितले की, पुण्यातील खराडी भागात सुरू असलेल्या ड्रग्स पार्टी प्रकरणात ७ जणांना अटक करण्यात आली. आज पहाटे ३.२० वाजण्याच्या सुमारास स्टेबर्ड अझुर सूट याठिकाणी गुन्हे शाखेने कारवाई केली. त्यावेळी आरोपींची पार्टी सुरू होती. ७ जणांकडून कोकेन सदृश पदार्थ जप्त करण्यात आले.

तसंच, 'आरोपींकडून ४१ लाख रुपयांचा मुद्देमाल जप्त करण्यात आला. ज्यामध्ये २.७० ग्रॅमचे कोकेन सदृश पदार्थ, ७० ग्रॅम गांजा सदृश पदार्थ जप्त, आरोपींचे १० मोबाईल, दोन चारचाकी वाहने, हुक्कापॉट सेट, दारू आणि बिअरच्या बॉटल्स, हुक्का फ्लेवर हे जप्त करण्यात आले.', असे पोलिस उपआयुक्तांनी सांगितले.

एकनाथ खडसे यांचे जावई आणि रोहिणी खडसे यांचे पती प्रांजल खेवलकर (४१ वर्षे), निखिल पोपटाणी (३५ वर्षे), समीर सय्यद (४१ वर्षे), सचिन भोंबे (४२ वर्षे), श्रीपाद यादव (२७ वर्षे), ईशा (२२ वर्षे), प्राची (२३ वर्षे) या सात आरोपींना पोलिसांनी अटक केली आहे. खराडी पोलिस ठाण्यात आरोपींवर एन.डी.पी.एस. अॅक्ट कलम ८ (क), २२ (ब) (११) अ, २१ (ब), २७ कोटपा ७ (२), २०(२) याप्रमाणे गुन्हा दाखल करण्यात आला आहे.