सागर आव्हाड, साम टीव्ही, प्रतिनिधी

पुण्याच्या रामवाडी येथून धक्कादायक प्रकार समोर आला आहे. रामवाडीमध्ये एका पेट्रोल चोराने तब्बल सहा मोटारसायकल जाळल्याची माहिती समोर आली आहे. पेट्रोल चोरी करत असताना चोराने गाड्यांवर बसून सिगारेट पेटवली. त्यानंतर दुचाकी गाड्यांनी पेट घेतला. या घटनेनंतर पोलिसांनी चोराला अटक केली आहे.

मिळालेल्या माहितीनुसार, पुण्यातील रामवाडी परिसरात मध्यरात्री एकच्या सुमारास ही घटना घडली. पेट्रोल चोरी करण्यासाठी आलेल्या आरोपीने सहा दुचाकी गाड्या जाळल्या. त्याने पेट्रोल चोरताना सिगारेट पेटवली. यादरम्यान गाड्यांनी पेट घेतला. आगीमध्ये सहा मोटारसायकल गाड्या जळून खाक झाल्याचे म्हटले जात आहे.

या घटनेनंतर स्थानिकांनी पोलिसांशी तात्काळ संपर्क केला. पोलिसांनी प्रथमेश बाजीराव पाटील (वयवर्ष २०) या तरुणाला अटक केली आहे. यानेच सिगारेट पेटवून मोटारसायकल जाळल्या होत्या. या तरुणावर आग लागणे (कलम ३२६ -अ) आणि पेट्रोल चोरी करण (कलम ३०३) यांच्या अंतर्गत गुन्हा दाखल करण्यात आला आहे.

पुण्यातील रामवाडी येथे पेट्रोल चोरी करणाऱ्या एका चोराने सहा मोटारसायकल जाळल्या. सिगारेट पेटवताच मोठा भडका उडाला. ही घटना कॅमेऱ्यामध्ये कैद झाली आहे. घटनेचे व्हिडीओ सोशल मीडियावर व्हायरल होत आहेत. या व्हिडीओमध्ये आगीची दाहकता पाहायला मिळत आहे. सदर घटनेमुळे परिसरात मोठी खळबळ उडाली आहे.