सचिन जाधव, साम टीव्ही

पुणे : पुण्यातील गुंडांनी पुन्हा एकदा उच्छाद मांडायला सुरुवात केली आहे. काही दिवसांपूर्वी कोथरुडमध्ये निलेश घायवळच्या टोळीने गोळीबार केला. या गोळीबारात एक व्यक्ती जखमी झाला होता. गोळीबाराच्या घटनेने एकच खळबळ उडाली होती. तर काही दिवसांपूर्वी आयुष कोमकर हत्या प्रकरणानेही खळबळ उडाली होती. या घटनेनंतर पुणे पोलीस अॅक्शन मोडमध्ये आली आहे. गुन्हेगारांनी मान बाहेर काढल्यास गजाआड जाणार, अशा इशारा गुन्हे शाखेचे पोलिस उपायुक्त निखिल पिंगळे यांनी दिला आहे.

गुन्हे शाखेचे पोलिस उपायुक्त निखिल पिंगळे यांनी माध्यमांशी संवाद साधला. यावेळी पिंगळे म्हणाले की,'पुण्यात एक-दोन नव्हे तर तब्बल ११ मोठ्या गॅंग कार्यरत आहेत. तर ८८ पेक्षा जास्त छोट्या गॅंग पुण्यात कार्यरत आहेत. या गँगवर वेगवेगळ्या माध्यमातून गुन्हे शाखा कारवाई करत असते. पोलिसांकडून गुंडांवर तडीपार, मकोकासारख्या कारवाई केली जातात'.

'पुणे पोलिस या गॅंगच्या विरोधात काम करत आहेत. पुण्यातील गुन्हेगारीच्या इतिहासात अनेक गोष्टी घडल्या आहेत. त्याच्यातून महत्वाची बाब म्हणजे पोलिसांना आता प्रत्येक गुन्ह्याशी निगडित असलेला गुन्हेगार शोधायचा आहे. आता गुन्हेगाराची लायकी दाखवून त्यांना न्यायालयाच्या दारात उभं करण्याचं काम पोलीस करत आहेत, असे पोलिस उपायुक्त पिंगळे यांनी सांगितलं.

'पुण्यातील ज्या गुन्हेगारांनी डोके बाहेर काढायचं काम केलं. ते आता गजाआड आहेत. तर राहिलेल्या गुन्हेगारांना सूचना आहे की, मान बाहेर काढाल तर मान गजाआड जाणार, असा इशारा देखील त्यांनी दिला.

'अल्पवयीन गुन्हेगार हा समाजाला धोका आहे. सिनेमा रिल्स यामध्ये जे दिसतं, ते समोर येत आहे. आम्हालाही अल्पवयीन गुन्हेगारावर कारवाई करताना अडचण येत असतात. निर्भया प्रकरणानंतर कायद्यात बदल झाले आहेत. आम्ही अल्पवयीन गुन्हेगारांचं मन परिवर्तन करण्याचं काम करत आहोत. आंदेकर प्रकरणी तपास सुरू आहे. यात अनेक प्रक्रिया पुढे येत आहेत. ज्यांनी तपास प्रक्रियेला अडचण आणली त्याच्यावर कारवाई केली जाईल. कोथरूड गोळीबार प्रकरणाचा तपास कोथरूड पोलीस करत आहेत, असे पुणे पोलीस उपायुक्त पिंगळे पुढे म्हणाले.