Pune News : अखिल मंडई मंडळ आणि श्रीमंत भाऊसाहेब रंगारी गणपती मंडळ परंपरेनुसार आणि प्रथेनुसार म्हणजेच रात्रीच्या सत्रात विसर्जन मिरवणुकीत सहभागी होणार असल्याची माहिती पोलिस आयुक्त अमितेश कुमार यांनी आज दिली. आज पुणे पोलिस आयुक्तालयात पोलिस आयुक्त अमितेश कुमार यांच्या उपस्थितीत आखिल मंडई मंडळ आणि श्रीमंत भाऊसाहेब रंगारी मंडळाच्या प्रमुख पदाधिकारी यांच्यासोबत झालेल्या बैठकीत हा निर्णय घेण्यात आला.

या बैठकीबाबत पोलिस आयुक्त अमितेश कुमार म्हणाले, "आज अखिल मंडई मंडळ आणि श्रीमंत भाऊसाहेब रंगारी मंडळ यांच्या उत्सव प्रमुख आणि अध्यक्ष यांच्याशी बैठक आयोजित केली गेली होती. यावेळी उत्सवसोबत विसर्जन मिरवणुकीबाबत चर्चा करण्यात आली. गर्दीचे नियोजन त्यासोबतच वेळेत आणि सुरळीत विसर्जन मिरवणूक संपन्न व्हावी याविषयी काही मुद्दे चर्चेत होते.

'त्याच पार्श्वभूमीवर तुम्ही तुमच्या पूर्वीच्या वेळेनुसार विसर्जन मिरवणुकीला सुरुवात करावी अशी विनंती आम्ही त्यांना केली. या विनंतीला मान देत दोन्ही मंडळांनी सकारात्मक निर्णय घेऊन पारंपरिक आणि प्रथेनुसारच विसर्जन मिरवणुकीत सहभागी होण्याचा निर्णय घेतले आहेत', असे वक्तव्य पुणे पोलीस आयुक्य अमितेश कुमार यांनी केले आहे.

यंदा अनंत चतुर्दशीच्या दिवशी पुण्यातील मानाचे पाच गणपतीची मिरवणूक मार्गस्थ झाल्यानंतर त्यांच्या मागे अखिल मंडई मंडळ आणि श्रीमंत भाऊसाहेब रंगारी यांनी सहभाग घेण्याचा निर्णय घेतला होता. मानाच्या पाच गणपतींमध्ये शेवटचा म्हणजेच मानाचा पाचवा कसबा गणपती मार्गस्थ होताच हे दोन्ही मंडळं मुख्य विसर्जन मिरवणुकीत सहभागी होणार असल्याची माहिती या दोन्ही मंडळांच्या प्रमुखांनी ३१ जुलै रोजी पत्रकार परिषद घेऊन दिली होती. येत्या २७ ऑगस्ट रोजी गणेशोत्सवाला सुरुवात होत असून ६ सप्टेंबर रोजी अनंतचतुर्दशी आहे.