सचिन जाधव , साम प्रतिनिधी

पुणे शहरातील वायू प्रदूषण वाढले आहे. शहरात आणि औद्योगिक परिसरात वाढत चाललेल्या वायू प्रदूषणामुळे श्वसन विकार, घशाचे संसर्ग आणि ऍलर्जीचे प्रमाण लक्षणीयरीत्या वाढलेत. हवा विषारी झाल्यानंतर आता प्रशासन यंत्रणा आता अॅक्शन मोडवर आले असून वायू प्रदूषण कमी करण्यासाठी उपाय योजना आखत आहे.

याच पार्श्वभूमीवर पुणे शहरात १५ वर्षांहून अधिक जुन्या वाहनांना बंदी केली जाणार आहे. तसा प्रस्ताव प्रादेशिक परिवहन प्राधिकरणाचे अध्यक्ष तथा जिल्हाधिकारी जितेंद्र डुडी राज्य सरकारकडे मान्यतेसाठी पाठविणार आहेत. त्याला मंजुरी मिळाल्यास सुमारे सात लाखांहून अधिक वाहनांना पुण्यात धावता येणार नाही.

पुणे प्रादेशिक परिवहन कार्यालयाकडे पुण्यात सहा लाख ८३ हजार ४११ खासगी संवर्गातील, तर ४६ हजार २८४ परिवहन संवर्गातील वाहनांचे आयुर्मान १५ वर्षांहून अधिक आहे. यात सर्वाधिक दुचाकी आहेत. दुचाकींची संख्या पाच लाख १२ हजार ५७५ आहे. दरम्यान ही सात लाख वाहने रस्त्यावर न आल्यास सुमारे ८० ते ९० टक्के प्रदूषण कमी होऊ शकते. विषारी घटक व नायट्रोजन ऑक्साइड्सचे प्रमाण ७० टक्क्यांनी कमी होईल. यासह शहरातील वाहतूक कोंडीचे प्रमाण कमी होणार आहे. वाढत चाललेल्या वायू प्रदूषणामुळे श्वसन विकार, घशाचे संसर्ग आणि ऍलर्जीचे प्रमाण लक्षणीयरीत्या वाढले आहे. लहान मुले, ज्येष्ठ नागरिक आणि गर्भवती महिलांमध्ये याचा अधिक गंभीर परिणाम दिसून येत आहे.

पुणे आणि पिंपरी-चिंचवडच्या हवेत दर तासाला तब्बल 6 टन सिमेंटचं विष मिसळलं जात असल्याची धक्कादायक माहिती समोर आलीय. पुणे आणि पिंपरी-चिंचवडच्या हवेत दरवर्षी तब्बल 50 हजार टन सिमेंटचे विष कालवले जाते. पुणे आणि पिंपरीत एकूण 502 अधिकृत प्लान्ट्स आहेत. त्यातील 372 प्लान्ट्स पुण्यात तर सुमारे 130 प्लान्ट्स पिंपरी- चिंचवड शहरात आहेत.