गोपाल मोटघरे, साम टीव्ही

पिंपरी चिंचवड: फुगेवाडी येथील धक्कादायक विषारी दारू मृत्यू प्रकरणातील मुख्य आरोपी असलेल्या विरका कुटुंबियाला महापालिका चांगलाच दणका देणार आहे. पिंपरी चिंचवड महानगरपालिका पुढील 24 तासांत विरका कुटुंबियांच्या घरावर बुलडोझर चालवून अनधिकृत बांधकाम जमीनदोस्त करणार आहे. महापालिकेच्या या धडक कारवाईमुळे परिसरात एकच खळबळ उडाली आहे.

40 वर्षांपासून सुरू होता अवैध दारू अड्डा

मिळालेल्या माहितीनुसार, फुगेवाडी परिसरातील संजय नगर येथे विरका कुटुंबीय गेल्या 40 वर्षांपासून आपल्या राहत्या घरातच अवैध हातभट्टी दारूचा अड्डा चालवत होते. याच अड्ड्यावरील विषारी दारुमुळे 17 निष्पाप नागरिकांचा बळी गेला. या घटनेनंतर प्रशासनाने विरका कुटुंबियांच्या बेकायदेशीर कृत्यांवर कडक पावले उचलण्यास सुरुवात केली आहे.

पिंपरी चिंचवड महापालिकेच्या झोपडपट्टी पुनर्वसन आणि निर्मूलन विभागाने विरका कुटुंबीयांनी मोठ्या प्रमाणावर अनधिकृत बांधकाम केल्याचा ठपका ठेवला आहे. त्यानुसार महापालिकेने त्यांच्या महापालिकेने त्यांच्या घरावर कायदेशीर नोटिस बजावली आहे. या नोटिसमध्ये स्पष्ट नमूद करण्यात आले आहे की, पुढील 24 तासांत बांधकाम अनधिकृत असल्याचा पुरावा सादर करावा, अन्यथा स्वतः हून हे बांधकाम न हटवल्यास त्यानंतरच्या 24 तासांत महापालिका स्वतःहून हे बांधकाम जमीनदोस्त केले जाईल. विशेष म्हणजे या संपूर्ण कारवाईचा आणि पाडकामाचा खर्च देखील विरका कुटुंबियांकडूनच वसूल केला जाईल, असा कडक इशारा देण्यात आला आहे.

कारवाईच्या भीतीने सामान हलवण्यास सुरुवात

महापालिकेची 'बुलडोझर' कारवाई होणार हे निश्चित होताच विरका कुटुंबीयांची मोठी धावपळ उडाली आहे. नोटीस लागल्यापासूनच त्यांनी कारवाईच्या भीतीने आपल्या घरातील मौल्यवान आणि महत्त्वाचे सामान इतर सुरक्षित ठिकाणी हलवण्यास सुरुवात केली आहे. या संपूर्ण प्रकरणावर प्रशासन आता काय मोठी कारवाई करते, याकडे सर्वांचे लक्ष लागले आहे