सचिन जाधव, साम टीव्ही, प्रतिनिधी

पुण्यातून एक धक्कादायक प्रकार उघडकीस आला आहे. एका महिलेने पती आणि त्याच्या प्रेयसीच्या जाचाला कंटाळून आत्महत्या केली. मानसिक आणि शारीरिक छळाला कंटाळून पीडित महिलेने राहत्या घरी गळफास घेऊन आत्महत्या केल्याची माहिती समोर आली आहे. या प्रकरणी महिलेच्या पती आणि त्याच्या प्रेयसी विरुद्ध गुन्हा दाखल करण्यात आला आहे.

मिळालेल्या माहितीनुसार, माधुरी विकास कोकणे असे आत्महत्या करणाऱ्या महिलेचे नाव आहे. तिने १० मे रोजी दुपारी राहत्या घरात गळफास घेऊन स्वत:ला संपवले. पती विकास कोकणे आणि त्याची प्रेयसी अर्चना अहिरे यांच्या छळाला कंटाळून माधुरीने आत्महत्या केल्याचे म्हटले जात आहे.

माधुरी आणि विकास यांचा काही वर्षांपूर्वी विवाह झाला होता. लग्नानंतर विकासचे अर्चना अहिरे हिच्याशी विवाहबाह्य संबंध सुरु झाले. ही गोष्ट समोर आल्यापासून माधुरी-विकास यांच्यात वारंवार वाद होऊ लागले. प्रेयसी, अर्चनाच्या सांगण्यावरुन विकासने त्याच्या माधुरीला मानसिक आणि शारीरिक त्रास द्यायला सुरुवात केली होती.

पतीच्या जाचाला कंटाळलेल्या माधुरी कोकणेने १० मे रोजी आत्महत्या केली. त्यानंतर तिचा भावाने भारती विद्यापीठ पोलीस ठाण्यात फिर्याद दाखल केली आहे. त्यावरुन विकास आणि अर्चना यांच्या विरोधात आत्महत्येस प्रवृत्त केल्याचा गुन्हा दाखल करण्यात आला आहे. या प्रकरणी भारती विद्यापीठ पोलिसांचा पुढील तपास सुरु आहे.