प्रसिद्ध पंजाबी गायक दिलजीत दोसांझचा पुण्यामध्ये म्युझिक कॉन्सर्ट होणार आहे. पुण्यातील कोथरूडमध्ये आज संध्याकाळी दिलजीत दोसांझचा लाईव्ह शो होणार आहे. ⁠कोथरूड परिसरातील काकडे फार्मवर हा कॉन्सर्ट होणार आहे. पण या कॉन्सर्टला भाजपचे नवनिर्वाचित आमदार चंद्रकांत पाटील, स्थानिक रहिवाशांनी आणि मनसेने विरोध केला आहे. यासाठीच शो होणाऱ्या मैदानाच्या बाहेर स्थानिकांनी आंदोलन केले.

दिलजीत दोसांझचा लाईव्ह शोला विरोध करत स्थानिक नागरिकांनी आज आंदोलन केले. ⁠सेव्ह कोथरूड असे फलक स्थानिक नागरिकांनी झळकावत काळ्या फिती बांधत हा शो होऊ नये अशी मागणी केली. या शोमध्ये मद्य विक्री देखील केली जाणार असून यामध्ये विक्रीला इथं परवानगी कशी दिली जाते असा सवाल देखील या स्थानिकांनी उपस्थित केला आहे.

या कार्यक्रमासाठी कमीतकमी ८०-१०० स्पीकरच्या भिंती उभारल्या जाणार आहेत. त्यामुळे राहणाऱ्या वयोवृध्द नागरीकांना याचा त्रास होईल म्हणून आम्ही या शोला विरोध करत असल्याचे इथल्या स्थानिक रहिवाशांनी सांगितलं. तर विजयाच्या दुसऱ्याच दिवशी आमदार चंद्रकांत पाटील यांनी हाती धुरा घेतली आहे.

दिलजीत दोसांझच्या कार्यक्रमाला चंद्रकांत पाटील यांनी विरोध केला. फक्त दारू विक्रीसाठी विरोध नाही तर हा कार्यक्रम देखील रद्द करा, अशा सुचना चंद्रकांत पाटील यांनी पुणे पोलिस आयुक्त, उत्पादन शुल्क विभाग, आणि जिल्हाधिकारी यांना दिल्या आहेत. असे कार्यक्रम समाजाला लागलेली किड आहे. त्यामुळे कोथरूडमध्ये होणाऱ्या या कार्यक्रमाला विरोध करत त्यांनी हा कार्यक्रम होऊ नये यासाठी मागणी केली आहे.