सचिन जाधव, पुणे

पुणे ग्रामीण पोलिस शिपाई पदाच्या भरतीबाबत मोठी अपडेट समोर आली आहे. पुणे ग्रामीण पोलिस शिपाई पदाच्या भरतीसाठी घेण्यात येणारी परीक्षा पुढे ढकलण्यात आली आहे. येत्या शनिवारी म्हणजे २४ ऑगस्ट रोजी ही परीक्षा होणार होती. पण ही परीक्षा आता पुढे ढकलण्यात आली आहे. याची परीक्षा देणाऱ्या विद्यार्थ्यांनी नोंद घ्यावी. परीक्षेची पुढील तारीख लवकरच जाहीर करण्यात येईल, अशी माहिती पुणे ग्रामीणचे पोलिस अधीक्षक पंकज देशमुख यांनी दिली आहे.

पुणे ग्रामीणच्या पोलिस शिपाई पदासाठी २०२२-२३ च्या भरती प्रक्रियेत मैदानी चाचणीत उत्तीर्ण झालेल्या उमेदवारांचा निकाल २० ऑगस्ट रोजी जाहीर करण्यात आला आहे. लेखी परीक्षेस पात्र झालेल्या ५ हजार ५४४ उमेदवारांची लेखी परीक्षा लोणी काळभोर येथील एमआयटी एडीटी युनिव्हर्सिटी येथे सकाळी १० वाजता आयोजित करण्यात आली होती. परंतू अपरिहार्य कारणामुळे ही परीक्षा पुढे ढकलण्यात आली आहे. लवकरच परीक्षेची पुढील तारीख जाहीर करण्यात येईल अशी माहिती पुणे ग्रामीण पोलिसांकडून देण्यात आली आहे.