पुण्यामध्ये पोलिस अधिकाऱ्यावर कोयता हल्ला करणाऱ्या आरोपींना पोलिसांनी बेड्या ठोकल्या आहेत. याप्रकरणी गणेश शाखेच्या पोलिसांनी आज दोन आरोपींना अटक केली. सोलापूरमधील (Solapur) वरवड टोलनाक्याजवळ या दोन्ही आरोपींना पोलिसांनी अटक केली. या दोन्ही आरोपींवर याआधी पुण्यात अनेक ठिकाणी काही गंभीर गुन्हे दाखल आहेत. अटकेनंतर या दोन्ही आरोपींना आज कोर्टामध्ये हजर करण्यात आले होते.

वानवडी पोलिस ठाण्याचे सहाय्यक पोलिस निरीक्षक रत्नदीप गायकवाड यांच्यावर रविवारी रामटेक परिसरात टोळक्याने कोयत्याने हल्ल्या केला होता. रामटेक परिसरामध्ये रविवारी टोळक्यामध्ये भांडण सुरू असल्याची माहिती त्यांना मिळाली होती. हे भांडण सोडवण्यासाठी पोलिस अधिकारी घटनास्थळी दाखल झाले होते. हे भांडण सोडवत असताना त्यांच्यावर टोळक्याने कोयता हल्ला केला होता. या हल्ल्यामध्ये ते गंभीर जखमी झाले आहेत. सध्या त्यांच्यावर रुग्णालयामध्ये उपचार सुरू आहेत.

रुग्णालयामध्ये उपचार सुरू असलेले पोलिस अधिकारी रत्नदीप गायकवाड यांनी सर मला लवकर बरं व्हायचं आहे आणि त्यांना पकडायचे आहे, असे त्यांनी पोलिस आयुक्तांना सांगितले. पुण्याचे पोलिस आयुक्त अमित कुमार यांनी आज रुग्णालयात जाऊन रत्नदीप गायकवाड यांची भेट घेतली. यावेळी त्यांनी मला लवकर बरे व्हायचे असल्याचे सांगितले. त्यांच्या या जिगरबा वृत्तीचे सर्वत्र कौतुक केले जात आहे.