सचिन जाधव

पुणे : येरवडा कारागृहात शिक्षा भोगत असताना तब्येत बिघडल्याने रुग्णालयात दाखल केले होते. ससून (Pune) रुग्णालयात उपचार घेत असलेला आरोपी ललित अनिल पाटील (वय ३४) याने पोलिसांना (Police) चकवा देवून पलायन केले. ही घटना सोमवारी रात्री आठ वाजेच्या सुमारास घडली. (Maharashtra News)

अमली पदार्थ बाळगल्याप्रकरणी ललित पाटील याच्यावर चाकण पोलिस ठाण्यात गुन्हा दाखल आहे. या गुन्ह्यात येरवडा कारागृहात शिक्षा भोगत असताना त्याला उपचारासाठी ससून रुग्णालयातील वॉड क्रमांक १६ मध्ये दाखल केले होते. ललित पाटील हा रुग्णालयाच्या कॅन्टीनमधील कामगार रौफ रहीम शेख आणि सुभाष जानकी मंडल या दोघांच्या मदतीने मेफेड्रॉन अमली पदार्थ विक्री करीत होता. या प्रकरणी गुन्हे शाखेच्या पोलिसांनी रुग्णालयाच्या परिसरातून शेख आणि मंडल यांना शनिवारी अटक केली होती. त्यांच्या ताब्यातून सुमारे दोन कोटी रुपयांचे मेफेड्रॉन अमली पदार्थ जप्त करण्यात आले होते. 

एक्स रे काढण्यासाठी नेताना पलायन 

सदर घटनेनंतर पाटील याला सोमवारी रात्री आठ वाजण्याच्या सुमारास एक्स रे काढण्यासाठी नेण्यात येत होते. त्यावेळी पोलिसांना चकवा देवून त्याने पलायन केले. दरम्यान, रात्री आठ वाजता एक्स रे काढण्यासाठी नेणे आणि पोलिसांचा बंदोबस्त असताना आरोपीने पलायन कसे केले, हा प्रश्न उपस्थित केला जात आहे.