Pune Navale Bridge Accident Death Toll: पुण्यातील अत्यंत धोकादायक मानल्या जाणाऱ्या नवले पुलाजवळ मध्यरात्री पुन्हा एकदा भीषण अपघात झाला आहे. साताऱ्याहून मुंबईच्या दिशेने जाणाऱ्या एका भरधाव कंटेनरचे ब्रेक फेल झाला. हा ट्रक भूमकर पुलावर इतर ३ ते ४ वाहनाला धडकला. या थरारक अपघातात दोन जणांचा जागीच दुर्दैवी मृत्यू झाला असून, इतर काही जण गंभीर जखमी झाले आहेत.

कात्रज-देहूरोड बायपासवरील मुंबई-बंगळूर महामार्गावर मध्यरात्री साडेबाराच्या सुमारास अपघाताची दुर्दैवी घटना घडली. साताऱ्याकडून मुंबईकडे चाललेला अवजड कंटेनर भूमकर पुलाजवळ आला असता त्याचे ब्रेक फेल झाले.

चालकाचे नियंत्रण सुटल्याने या भरधाव कंटेनरने पुढे जाणाऱ्या ट्रकला आणि रस्त्यावरील इतर वाहनांना जोरात धडक दिली. ही धडक इतकी भीषण होती की ३ ट्रक एकमेकांवर आदळले आणि वाहनांचा मोठा चक्काचूर झाला. यामध्ये कंटेनरमधील दोन जणांचा जागीच मृत्यू झाला असून जखमींना तातडीने जवळच्या रुग्णालयात उपचारासाठी दाखल करण्यात आले आहे.

घटनेची माहिती मिळताच स्थानिक नागरिक, पोलीस आणि रुग्णवाहिका घटनास्थळी दाखल झाले. अपघातात अडकलेले मृतदेह बाहेर काढण्यात आले आहेत. या मध्यरात्री झालेल्या अपघातामुळे मुंबई-बंगळूर महामार्गावर काही काळ वाहनांच्या लांबच लांब रांगा लागून मोठी वाहतूक कोंडी झाली होती. पोलीस या प्रकरणाचा पुढील तपास करत आहेत.