'ज्या जागेवर चिमुकलीची हत्या झाली आहे, त्याच जागेवर नेऊन त्या नराधमाला ठेचून ठार मारलं पाहिजे, ही प्रतिक्रिया कोणत्या नागरिकांची किंवा पीडितेच्या कुटुंबियांची नाही, तर नसरापूर प्रकरणातील आरोपीच्या पत्नीची आहे. पतीच्या कृत्यामुळे आम्हाला लोकांची हाय सहन करावी लागतेय अशा नराधमाला जिवंत जाळलं पाहिजे भर चौकात जाळलं पाहिजे, असं आरोपीची पत्नी म्हणाली आहे.

पुण्यातील भोर तालुक्यात असलेल्या नसरापूर येथे एका चार वर्षाच्या चिमुरडीची अत्याचार करून हत्या झाली होती. या प्रकरणातील आरोपीला अटक करण्यात आली असून आरोपीच्या पत्नीने आणि त्याच्या मुलाने माध्यमांना प्रतिक्रिया दिली आहे. भोर तालुक्यातील नसरापूर प्रकरणाने संपूर्ण राज्य हादरला आहे. चार वर्षाच्या चिमुकलीवर अत्याचार करून तिची हत्या करणाऱ्या आरोपीला फाशीचीच शिक्षा झाली पाहिजे, अशी मागणी प्रत्येक नागरिक करत आहे.

या पार्श्वभूमीवर नसरापूरमधील ग्रामस्थांनी उपमुख्यमंत्री एकनाथ शिंदे यांची भेट घेतली. आरोपीला कठोरात कठोर शिक्षा झाली पाहिजे अशी मागणी केली. दुसरीकडे पुणे पोलीस आयुक्तांनी मृत पीडितेच्या कुटुंबाची भेट घेत न्याय देणार असल्याची ग्वाही दिली. सर्व स्तरातून नसरापूर प्रकरणी संतप्त प्रतिक्रिया येत आहेत, तशीच तीव्र प्रतिक्रिया आरोपीच्या पत्नीने दिली आहे.

गेल्या दहा वर्षांपासून तो माझ्यासोबत राहत नाही. ज्या जागेवर त्याने हे कृत्य केलं तिथेच त्याला ठेचून मारा. नुसती फाशीची शिक्षा नको त्याला ठेचून मारलं तरच माझा अग्नी शांत होईल,असं आरोपीची पत्नी म्हणाली आहे. आरोपीला सोडवण्यासाठी आम्ही सोडवणार नाही, ना त्याच्यासाठी काही करणार. मला त्याचे तोंड देखील बघायचं नाही. त्याचे अंत्यसंस्कार केले हे सुद्धा सांगू नका, ही आपली नम्र विनंती असल्याचं त्या म्हणाल्या. आम्हाला मानसिक त्रास होतोय. तर जी चिमुरडी या घटनेत गेली तिच्यात मी माझी भाची पाहतो, त्यामुळे नराधमाला जिवंत जाळला पाहिजे, अशी प्रतिक्रिया आरोपीच्या मुलाने दिली आहे.

नसरापूरमधील ग्रामस्थानी घेतली उपमुख्यमंत्री एकनाथ शिंदेंची भेट

भोर नसरापूर येथील चिमुकलीवर पाशवी अत्याचार करून तिची हत्या करणाऱ्या नराधमाला फाशीची शिक्षाच योग्य असून, त्याला लवकरात लवकर फासावर चढवण्याशिवाय सरकार स्वस्थ बसणार नाही, असे उपमुख्यमंत्री एकनाथ शिंदे यांनी सांगितले. नसरापूर ग्रामपंचायत सदस्य आणि इतर ग्रामस्थानी आज आमदार दिलीप लांडे यांच्या पुढाकाराने उपमुख्यमंत्री एकनाथ शिंदे यांची भेट घेतली. यावेळी त्यांनी सरकार या घटनेला जबाबदार असलेला आरोपीला फासावर चढवण्याची मागणी करणारे निवेदन त्यांना दिले.