सचिन जाधव, पुणे प्रतिनिधी, साम टीव्ही मराठी

Pune Municipal Corporation nominated corporators list 2026 : पुणे महापालिकेत आज १० स्वीकृत नगरसेवकांच्या नावावर शिक्कामोर्तब करण्यात आले आहे. पुणे महानगरपालिकेत सर्वात मोठा पक्ष म्हणून भाजपचे ७, राष्ट्रवादी काँग्रेस पार्टी अजित पवार गटाचे २ तर काँग्रेसचा १ असे स्वीकृत नगरसेवक निवडण्यात आले आहेत. पुणे महापालिका निवडणूक होऊन एक महिन्यानंतर स्वीकृत नगरसेवकांची निवड करण्यात आली आहे. महानगरपालिका निवडणुकीत भाजपने ११९ जागा जिंकत सर्वात मोठा पक्ष म्हणून महापालिकेत सत्ता मिळवली आहे.

महापौर, उपमहापौर, सभागृह नेते आणि स्थायी समिती अध्यक्ष या सर्व पदावर भाजपचे वर्चस्व आहे. त्यामुळे स्वीकृत नगरसेवकांमध्ये ही भाजपला सात स्वीकृत नगरसेवक यामध्ये निवडण्याची संधी मिळाली. त्यासाठी जवळपास ३०० जण इच्छुक असल्याचं सभागृह नेत्यांनी सांगितले होते. भाजपने निष्ठावांतांना संधी देत ७ जणांची निवड केली. काकडे, शेंडगे आणि पुरोहित यांना भाजपकडून संधी देण्यात आलेली आहे.

राष्ट्रवादी काँग्रेस पार्टी अजित पवार गटाकडून दोन जणांना संधी देण्यात आली आहे. त्यामध्ये अनुभवी म्हणून माजी महापौर दत्तात्रय धनकवडे यांची निवड करण्यात आली आहे. तर युवक राष्ट्रवादी काँग्रेस पदाधिकारी राकेश कामठे यालाही उमेदवारी देण्यात आले आहे. दोन जागेसाठी राष्ट्रवादी काँग्रेसकडून जवळपास 100 जण इच्छुक होते तर काँग्रेसने एका जागेवर कामगार नेते सुनील शिंदे यांची निवड केली आहे. काँग्रेसकडून जवळपास एका जागेसाठी ६८ जण इच्छुक होते.

पुणे महापालिकेसाठी 10 स्वीकृत नगरसेवकांची निवड

पुणे महापालिका भाजपचे स्वीकृत नगरसेवक

निलेश कोंढाळकर

प्रियंका शेंडगे

विश्वास नानावरे

राजेंद्र काकडे

रवी साळेगावकर

जयप्रकाश पुरोहित

उदय लेले

काँग्रेस

सुनील शिंदे

राष्ट्रवादी काँग्रेस पार्टी

दत्तात्रय धनकवडे

राकेश कामठे