पुण्यात गुन्हेगारी घटनांमध्ये वाढ होत असल्याचं चित्र आहे. अशातच आणखी एका घटनेमुळे परिसरात खळबळ उडाली आहे. राजाबहादूर मिल्स येथील किकी नावाच्या पबमध्ये नामांकित कॉलेजमधील तरुण तरुणींची फ्रेशर्स पार्टी आयोजित करण्यात आली होती. या पार्टीत शेकडो अल्पवयीन मुलांना सरसकट मद्य विक्री सुरू होती. या पार्टीवर मनविसेने धडक देत पार्टी बंद पाडली.

यावेळी पब चालकांकडून कोणत्याही प्रकारचे ओळखपत्र तपासले गेले नाही. तसेच प्रवेशासाठी कोणतीही रेकॉर्ड रजिस्टरही ठेवले गेले नसल्याची माहिती समोर आली आहे. १७ ते २१ वयोगटातील अनेक विद्यार्थ्यांना विनाअडथळा प्रवेश देण्यात आले. तसेच त्यांना मद्यही पुरवण्यात आले, असा गंभीर आरोप महाराष्ट्र नवनिर्माण विद्यार्थी सेनेच्या कार्यकर्त्यांनी केला.

यावेळी मनविसेच्या कार्यकर्त्यांसह राज्य उत्पादन शुल्क विभागाचे अधिकारीही घटनास्थळी उपस्थित होते. मनविसेनं यावेळी पब चालकांना थेट इशाराही दिला. 'यापुढे जर कुठल्याही पब किंवा रेस्टॉरंटमध्ये फ्रेशर्स पार्टीच्या नावाखाली अल्पवयीन मुलांना दारू पाजली, तर त्या पबची एकही काच शिल्लक ठेवली जाणार नाही; संपूर्ण पब फोडून टाकला जाईल', असा इशारा मनविसेचे शहराध्यक्ष धनंजय दळवी यांनी दिला.

या कारवाईमुळे पुणे शहरातील पब्समध्ये अल्पवयीन मुलांना सुरू असलेल्या बेकायदेशीर मद्यविक्रीवर पुन्हा एकदा प्रश्नचिन्ह निर्माण झाले आहे.