Pune Metro : पुणे महानगर प्रदेश विकास प्राधिकरणाच्या पुणे मेट्रो प्रकल्पाचा महत्त्वाचा टप्पा पार झाला आहे. पीएमआरडीएने हिंजवडी ते शिवाजीनगर मेट्रो मार्गिका ३ प्रकल्पासाठी आवश्यक असलेली जमिनीचा ९९.९४ टक्के भाग यशस्वीरित्या संपादित करण्यात आला आहे. याच दरम्यान राजभवनाने २६३.७८ चौरस मीटर जमिनीसाठी दिलेल्या परवानगीमुळे प्रकल्पाला आवश्यक असलेली जमीन प्राधिकरण विभागाला मिळाली आहे.

पुणे मेट्रो मार्गिका ३ ही सार्वजनिक आणि खासगी भागीदारी मॉडेलवर राबण्यात येत आहे. २०१८ मध्ये या प्रकल्पाला सरकारद्वारे मान्यता मिळाली. पीएमआरडीएने प्रकल्प राबवण्याच्या उद्देशाने मेट्रो सवलत कंपनी म्हणून पुणे आयडी सिटी मेट्रो रेल लिमिटेडसोबत सवलत करार मान्य केला.

पीएमआरडीएचे जनसंपर्क अधिकारी यांनी यासंदर्भात माहिती दिली आहे. ते म्हणाले, 'मार्गिका ३ चे ८३ टक्के काम आतापर्यंत पूर्ण झाले आहे. काही दिवसांपासून सावित्रीबाई फुले पुणे विद्यापीठाच्या शेजारील राजभवन परिसरातील जमीन प्राधिकरणाद्वारे संपादित करण्यात आली आहे. या जमिनीचा वापर मेट्रो स्थानकाचा जिना बांधण्यासाठी केला जाणार असल्याचे म्हटले जात आहे'.

पुणे महानगर प्रदेश विकास प्राधिकरणाने पुणे विद्यापीठाच्या जवळची राजभवनाची जमीन हस्तांतरित करण्याचा प्रस्ताव नोव्हेंबर २०२२ मध्ये सादर करण्यात आला होता. आता अंतिम जमिनीच्या मंजुरीमुळे मेट्रो मार्गिका ३ प्रकल्पाच्या कामाला वेग येईल असा विश्वास प्राधिकरण विभागाला आहेत.