पुणे : पुणेकरांसाठी एक दिलासादायक बातमी समोर आली आहे. खडकी मेट्रो स्थानक उद्या, शनिवार २१ जून २०२५ रोजी प्रवासी सेवेसाठी खुले होत आहे. हे स्थानक पुणे मेट्रोच्या पहिल्या टप्प्यातील पिंपरी चिंचवड महापालिका ते स्वारगेट मार्गावर आहे. या स्थानक प्रवाशांच्या वाहतुकीसाठी खुले होणार असल्याने सार्वजनिक वाहतूक अधिक सक्षम होण्याची शक्यता आहे.

खडकी मेट्रो स्थानक हे खडकी रेल्वे स्थानकाच्या अगदी जवळ आहे. यामुळे प्रवाशांना मेट्रोमधून थेट रेल्वेसाठी प्रवेश मिळणार आहे. मेट्रो आणि रेल्वे या दोन्ही सेवा एकाच ठिकाणी एकत्र आल्यामुळे प्रवाशांचा प्रवास अधिक सुलभ आणि अखंड होणार आहे. त्यामुळे रेल्वेने येणाऱ्या-जाणाऱ्या प्रवाशांना मोठा फायदा होणार आहे.

या स्थानकामुळे खडकी, पुणे विद्यापीठ, औंध आयटी पार्क, खडकी कॅन्टोन्मेंट, खडकी बाजार, रेंज हिल, औंध रस्ता, ऑर्डिनन्स फॅक्टरी हॉस्पिटल आणि मुळा रस्ता या परिसरांमध्ये जाणं अधिक सोयीचं होणार आहे. मेट्रो सेवा सुरू झाल्याने कामासाठी जाणाऱ्या व येणाऱ्या नागरिकांचा प्रवास जलद आणि आरामदायक होईल.

पुणे मेट्रोच्या विस्तारामध्ये खडकी स्थानकाची भर पडल्यामुळे पुणे आणि पिंपरी-चिंचवड या शहरांना जोडणाऱ्या रस्त्यांवरील वाहतूक व्यवस्थेला बळकटी मिळेल. यामुळे वाहतूक कोंडीची समस्या कमी होईल, असे वक्तव्य पुणे महामेट्रोचे व्यवस्थापकीय संचालक श्रावण हर्डीकर यांनी केले आहे. खडकी मेट्रो स्थानक सुरु होणार असल्याने प्रवाशांनी आनंद व्यक्त केला आहे.