रोहिदास गाडगे, पुणे

पुणे जिल्ह्यातील जुन्नर तालुक्यात बिबट्यांच्या वाढत्या वावरामुळे नागरिकांमध्ये भीतीचे वातावरण निर्माण झाले आहे. मानवी वस्तीजवळ वारंवार बिबट्यांचे दर्शन होत असतानाच आता लहान मुलांवर हल्ल्यांच्या घटना समोर येऊ लागल्याने ही समस्या अधिकच गंभीर बनत आहे. अशाच एका धक्कादायक घटनेने ओतूर परिसर हादरून गेला आहे.

ओतूर येथील वाकचौरे वस्ती परिसरात आज सकाळी मॉर्निंग वॉकला गेलेल्या दोन बहिणींवर बिबट्याने अचानक हल्ला केला. काव्या वाकचौरे आणि कल्याणी वाकचौरे या दोघी सकाळच्या वेळी परिसरात मॉर्निंग वॉक करत असताना दबा धरून बसलेल्या बिबट्याने काव्यावर झडप घातली. या अचानक झालेल्या हल्ल्यात काव्या गंभीर जखमी झाली असून तिच्या पाठीवर, पोटावर आणि मांडीवर खोल जखमा झाल्या आहेत.

घटनेनंतर परिसरात एकच खळबळ उडाली. मात्र, या प्रसंगी काव्याची बहीण कल्याणी हिने धैर्य आणि प्रसंगावधान दाखवत मोठ्याने आरडाओरडा केला. तिच्या आवाजामुळे बिबट्या घाबरून पळून गेला आणि मोठा अनर्थ टळला. कल्याणीच्या तत्परतेमुळे काव्याचा जीव वाचल्याचे स्थानिक नागरिकांकडून सांगितले जात आहे.

घटनेनंतर स्थानिकांनी तत्काळ घटनास्थळी धाव घेत जखमी काव्याला ओतूर ग्रामीण रुग्णालयात दाखल केले. सध्या तिच्यावर उपचार सुरू असून तिची प्रकृती स्थिर असल्याची माहिती मिळत आहे. या घटनेमुळे परिसरातील नागरिकांमध्ये भीतीचे वातावरण असून पालकांमध्येही चिंतेची भावना निर्माण झाली आहे. दरम्यान, जुन्नर तालुक्यातील मानवी वस्तीजवळ बिबट्यांचा वाढता वावर ही गंभीर बाब ठरत आहे. वनविभागाने याकडे तातडीने लक्ष देऊन आवश्यक उपाययोजना कराव्यात, अशी मागणी नागरिकांकडून होत आहे.