अक्षय बडवे, साम टीव्ही

पुण्यात कोयता गँगचा पुन्हा धुमाकूळ पाहायला मिळत आहे. पुण्यातील कोंढवा भागात किरकोळ कारणावरून तरुणावर कोयत्याने वार केल्याची घटना घडली आहे. या घटनेचा थरार सीसीटीव्ही कॅमेऱ्यात कैद झाला आहे. या घटनेने कोयता गँगने पुन्हा डोके वर काढल्याचे समोर आले आहे.

पुण्यातील कोंढवा भागातील दिलाश शेख या तरुणावर काहींनी कोयत्याने वार केला. कोंढवा पोलीस ठाण्याच्या हद्दीत हा धक्कादायक प्रकार घडला आहे. कोंढव्यातील दिलशाद शेख या तरुणाने दोघांच्या विरोधात पोलिसांत तक्रार दाखल केली. या घटनेनंतर पोलिसांनी दोघांना अटक केली. तबरेज शेख (२६) आणि अरबाज खान (३०) असे अटक करण्यात आलेल्या आरोपींची नाव आहेत.

नेमकं काय घडलं?

पुण्यातील कोंढवा खुर्द भागातील शिवनेरी नगर भागात १७ मे रोजी रात्री ११.१५ वाजता ही घटना घडली. तक्रारदार बंद दुकानाजवळ उभा होता. त्याचवेळी आरोपी तिकडे आले. त्यांनी तक्रारदाराच्या दुचाकीमुळे वाहतुकीला अडथळा होत असल्याचे सांगितले. त्यानंतर आरोपी हे तक्रारदाराशी वाद घालू लागले. पुढे आरोपींनी तक्रारदाराला शिवीगाळ करून लाथाबुक्यांनी मारहाण करण्यात सुरुवात केली. या मारहाणीदरम्यान आरोपींनी तक्रारदाराला जमीनीवर पाडलं.

मारहाण करताना आरोपी तरबेजने त्याच्या हातातील कोयत्यासारख्या धारदार शस्त्राच्या पात्याच्या मागील बाजूने तक्रारदाराच्या पाठीवर वार केला. दोघांच्या हल्ल्यात तक्रारदाराला जखमी केले. ही सगळी घटना सीसीटीव्हीमध्ये कैद झाली होती. या प्रकरणाचा शोध घेतल्यानंतर पोलिसांनी २ जणांना अटक केली आहे.

सीसीटीव्हीमध्ये काय दिसत आहे?

आरोपींनी तक्रारदाराची कॉलर पकडली. त्यानंतर त्याला बंद दुकानावर आपटलं. आरोपींच्या मारहाणीमुळे तक्रारदार जमिनीवर कोसळला. त्यानंतर आरोपीसोबत असलेल्या तरुणांनीही तक्रारदाराला मारहाण करण्यास सुरुवात केली. या मारहाणीदरम्यान एकाने हळूच खिशातून कोयत्यासारखा दिसणारं शस्त्र बाहेर काढलं. त्यानंतर आरोपीने तक्रारदाराच्या पाठीवर वार केले. या मारहाणीच्या घटनेमुळे परिसरात एकच खळबळ उडाली.