Pune : ताम्हिणी घाटामध्ये एका तरुणाचा मृतदेह बेवारस अवस्थेत आढळून आला. या प्रकरणाचा उलगडा करण्यात पोलिसांना यश आले आहे. हत्या प्रकरणात पोलिसांनी मृत तरुणाच्या थोरल्या भावाला अटक केली आहे. थोरल्या भावाने किरकोळ वादातून त्याच्या धाकट्या भावाची हत्या केल्याची माहिती समोर आली आहे. या प्रकरणामुळे परिसरात खळबळ उडाली आहे.

मिळालेल्या माहितीनुसार, काल शनिवारी (२६ जुलै) सकाळी ताम्हिणी घाटामध्ये पौड पोलिसांना एका तरुणाचा बेवारस मृतदेह सापडला होता. या तरुणाची ओळख पटली नव्हती. तपासानंतर तरुणाची ओळख पटली. तरुणाच्या थोरल्या भावाने त्याची हत्या केल्याची माहिती पोलिसांनी त्यांच्या सूत्रांकडून मिळाली. त्यानंतर पोलिसांनी मृत तरुणाच्या भावाचा शोध घेण्यास सुरुवात केली.

तरुणाचा थोरला भाऊ हा पुण्यातील कर्वेनगरमध्ये लपून बसला होता. पोलिसांनी शोधून आरोपीला अटक केली. चौकशीदरम्यान आरोपीने धाकट्या भावाची हत्या केल्याचे कबुल केले. आरोपीचे नाव अनिकेत आणि मृत तरुणाचे नाव ऋषिकेश असे आहे. आरोपीने शुल्लक कारणावरुन त्याच्या धाकट्या भावाची हत्या केल्याचे चौकशीतून समोर आले.

नेमकं काय घडलं?

ऋषिकेशला दारुसह अंमली पदार्थांचे व्यसन होते. ऋषिकेश आणि अनिकेत शुक्रवारी (२५ जुलै) कर्वेनगरवरुन दुचाकीने कोकणात जाण्यासाठी निघाले होते. ताम्हिणी घाटातील गोणवडी गावाजवळ मध्यरात्री दोघे भाऊ थांबले. ऋषिकेशला अनिकेतने व्यसन सोडण्यास सांगितले. या व्यसनाच्या मुद्यावरुन दोघांमध्ये वाद झाला. तेव्हा रागाच्या भरात अनिकेतने त्याच्या धाकट्या भावाची, ऋषिकेशची हत्या केली. त्यानंतर अनिकेत घाबरुन घटनास्थळाहून पळून गेला.