पुण्यापाठोपाठ पिंपरी चिंचवडमधील काही शाळांना २० जानेवारी रोजी सुट्टी जाहीर करण्यात आली आहे. पुणे ग्रँड चॅलेंज टूर या सायकल स्पर्धेच्या पार्श्वभूमीवर जिल्हाधिकारी जितेंद्र डुडी यांनी हा निर्णय घेतला आहे.

शहरात सायकल स्पर्धेचं आयोजन करण्यात आलं आहे. स्पर्धेच्या मार्गावरील सर्व शाळांना सुट्टी जाहीर करण्यात आली आहे. यासाठी जिल्हाधिकारी जितेंद्र डुडी यांनी आदेश जारी केले आहेत. पहिल्या टप्प्याच्या दिवशी पिंपरी-चिंचवड शहरातील स्पर्धा मार्गावरील सर्व प्रकारच्या खासगी आणि सरकारी शाळांना मंगळवारी २० रोजी सुट्टी जाहीर केली आहे.

आंतरराष्ट्रीय सायकल स्पर्धा १९ ते २३ जानेवारी दरम्यान आयोजित करण्यात आली आहे. पुण्यातील जे एम आणि एफ सी रस्ता उद्या वाहतुकीसाठी सकाळी ९ ते संध्याकाळी ६ पर्यंत बंद राहणार आहे. पुणे शहरातील काही मार्गांवर असलेल्या शाळांनाही सुट्टी जाहीर करण्यात आली आहे.

परीक्षा पुढे ढकलणार

पुणे जिल्ह्यात होत असलेल्या ‘पुणे ग्रॅंड चॅलेंज टूर २०२६’ या आंतरराष्ट्रीय स्पर्धेनिमित्त संबंधित परिसरातील शाळा, महाविद्यालये, शिक्षण संस्थांना उद्या सुट्टी जाहीर केली आहे. या पार्श्वभूमीवर सावित्रीबाई फुले पुणे विद्यापीठ कार्यालयास उद्या सुटी जाहीर करण्यात आली आहे. सोमवारी होणाऱ्या हिवाळी सत्र परीक्षांचे पुनर्नियोजन होणार आहे. या संबंधित महाविद्यालयांतील विद्यार्थ्यांच्या सोमवारी होणाऱ्या हिवाळी सत्रामधील विविध अभ्यासक्रमांच्या नियोजित परीक्षा पुनर्नियोजित करण्यात येणार आहे.