पुण्यात गेले काही दिवसांपासून DJ वॉर सुरू असून अखेर याबाबत मोठा निर्णय घेण्यात आला आहे. यंदाच्या गणेशोत्सवादरम्यान मंडळांना लाऊडस्पीकर वापरण्यासाठी रात्री १२ वाजेपर्यंत विशेष परवानगी देण्यात आली आहे. पुणे जिल्हाधिकाऱ्यांनी यासंदर्भातील आदेश जारी केले असून, गणेशोत्सवातील ठराविक पाच दिवस ही सवलत लागू राहणार असल्याची माहिती आहे. जिल्हाधिकाऱ्यांच्या या निर्णयामुळे गणेशभक्तांमध्ये आनंद पाहायला मिळत आहे.

पुण्याचे जिल्हाधिकारी जितेंद्र डुड्डी यांच्या आदेशानुसार, पुणेकरांना यंदाच्या गणेशोत्सवात डीजेला परवानगी देण्यात आली आहे. परंतु णेशोत्सवातील ठराविक पाच दिवस ही सवलत लागू राहणार असल्याचे त्यांनी म्हटले. गणेशोत्सवातील सहावा, सातवा, नववा, दहावा आणि बारावा दिवस अशा पाच दिवशी गणेश मंडळांना रात्री १२ वाजेपर्यंत लाऊडस्पीकर वाजवण्याची मुभा देण्यात आली आहे. यामुळे गणेश मंडळांना सांस्कृतिक कार्यक्रम, भजन, कीर्तन तसेच इतर धार्मिक आणि सामाजिक उपक्रम रात्री उशिरापर्यंत आयोजित करता येणार आहेत.

ही विशेष परवानगी सप्टेंबर महिन्यातील १९, २०, २२, २३ आणि २५ सप्टेंबर या पाच दिवसांसाठी देण्यात आली आहे. त्यामुळे या दिवशी पुणे शहर आणि जिल्ह्यातील गणेश मंडळांना रात्री १२ वाजेपर्यंत डीजेचा वापर करता येणार आहे. गणेशोत्सव हा पुण्याच्या सांस्कृतिक आणि सामाजिक जीवनातील अत्यंत महत्त्वाचा उत्सव मानला जातो. दरवर्षी मोठ्या उत्साहात गणेशोत्सव साजरा केला जातो.

विविध गणेश मंडळांकडून धार्मिक कार्यक्रमांसोबतच सामाजिक उपक्रम, सांस्कृतिक कार्यक्रम आणि जनजागृतीपर कार्यक्रमांचे आयोजन केले जाते. त्यामुळे रात्री १२ वाजेपर्यंत लाऊडस्पीकरला मिळालेल्या या परवानगीमुळे मंडळांना मोठा दिलासा मिळाला आहे. मात्र, लाऊडस्पीकर वापरताना प्रशासनाने घालून दिलेले नियम आणि ध्वनी प्रदूषणासंदर्भातील मर्यादा पाळणे आवश्यक राहणार आहे. नागरिकांना त्रास होणार नाही, याची काळजी घेण्याचे आवाहनही करण्यात आली आहे.