सागर आव्हाड, साम टीव्ही

पुणे : पुण्यातील धनकवडी येथील अहिल्यादेवी चौकात असलेल्या एका चहाच्या दुकानात दूध तापवताना सिलेंडरचा भीषण स्फोट झाला. या भीषण दुर्घटनेत संतोष हेगडे (वय २०) या तरुण कामगाराचा दुर्दैवी मृत्यू झाला.

मिळलेल्या माहितीनुसार, आज सायंकाळी चारच्या सुमारास दुकानातील कामगार संतोष चहा बनवत असताना अचानक स्फोट झाला. यामुळे ग्राहक आणि अन्य कामगारांनी तातडीने बाहेर धाव घेतली. मात्र, संतोष हेगडे दुकानात अडकला. स्फोटानंतर आग भडकली आणि आगीच्या झळा शेजारच्या दोन दुकानांनाही बसल्या, ज्यामुळे काही प्रमाणात नुकसान झालं.

कात्रज आणि गंगाधाम अग्निशमन केंद्राचे जवान तातडीने घटनास्थळी दाखल झाले. दुकानात एक कामगार अडकलेला असल्याचे समजताच जवानांनी पाण्याचा फवारा मारत त्याला बाहेर काढले. मात्र, गंभीर भाजल्याने उपचारादरम्यान त्याचा मृत्यू झाला. तीन सिलेंडरमधून मोठ्या प्रमाणात वायू गळती होत असल्याचे आढळून आल्यानं अग्निशमन दलाने हे सिलेंडर ताब्यात घेतलं. वेळीच आग आटोक्यात आणल्याने मोठा अनर्थ टळला. या घटनेमुळे परिसरात मोठी गर्दी झाली आणि वाहतूक कोंडी निर्माण झाली. वाहतूक पोलिसांनी त्वरित परिस्थिती नियंत्रणात आणून रस्ता मोकळा केला. घटनेचा पुढील तपास धनकवडी पोलीस आणि अग्निशमन विभाग करत आहे.

संतोष हेगडे असं मृत्यू झालेल्या कामगाराचा मृत्यू झाला आहे. हृदयद्रावक बाब म्हणजे, या चहाच्या दुकानात आज तो पहिल्याच दिवशी कामावर आला होता. मृत्यू झालेला कामगार सोलापूर जिल्ह्यातील हिजगी गावचा राहिवासी असल्याची माहिती आहे. मृत्यू झालेल्या कामगाराला आई वडील नसल्याची प्राथमिक माहिती देखील मिळाली आहे. दरम्यान, हॉटेल चालक केशव श्रीमंत जाधव हा बीडचा असल्याची माहिती देखील समोर आली आहे. मृत्यू झालेल्या कामगाराचा मृतदेह शवविच्छेदनासाठी ससून रुग्णालयात नेण्यात आला आहे.