• पुण्यात घोरपडे पेठ आणि लोहियानगर येथे गोळीबार

• दोन वेगवेगळ्या ठिकाणी गोळीबाराच्या घटना घडल्या

• पहिल्या घटनेत एक तरुण गोळी लागून गंभीर जखमी झाला

• दुसऱ्या घटनेत तरुणावर गोळीबार झाला पण तो थोडक्यात बचावला

अक्षय बडवे, पुणे

गोळीबाराच्या दोन घटनांमुळे पुणे हादरले आहे. पुण्यातील दोन वेगवेगळ्या परिसरात शुक्रवारी हा गोळीबाराचा थरार पाहायला मिळाला. पुण्यातील खडक पोलिस ठाण्याच्या हद्दीतील घोरपडे पेठ आणि लोहियानगरमध्ये या घटना घडल्या या घटनेमुळे एक तरुण गंभीर जखमी झाला असून त्यांच्यावर रुग्णालयात उपचार सुरू आहेत. गोळीबाराच्या घटनांमुळे पुणेकरांमध्ये भीतीचे वातावरण आहे. पूर्ववैमनस्यातून या घटना घडल्याची माहिती समोर आली आहे. पोलिस सध्या या घटनांचा तपास करत असून एका घटनेतील ५ आरोपींच्या पोलिसांनी मुसक्या आवळल्या.

पहिली घटना -

पुण्यातल्या घोरपडे पेठ पोलिस चौकीपासून काही अंतरावर अनुसया टॉवर्ससमोर सकाळच्या सुमारास ही गोळीबाराची घटा घडली. पोलिस उपायुक्त ऋषिकेश रावळ यांनी दिलेल्या माहितीनुसार, फिर्यादी ख्वाजाउद्दीन नजीर शेख उर्फ नुरु शेख (वय २८, रा. गणेश पेठ) यांच्या नातेवाइकाने काही वर्षांपूर्वी आरोपीच्या वडिलांस मारहाण केली होती.

या जुन्या वादातून दुचाकीवरून आलेल्या सुजल उर्फ चिम्या सुनील परदेशी (वय २१, रा. कासेवाडी) आणि त्याच्या साथीदारांनी नुरु शेख याच्यावर पिस्तुलातून गोळ्या झाडल्या. यातील एक गोळी नुरु शेख याच्या पाठीत लागल्याने तो जखमी झाला. आरोपी सुजल परदेशी यालागोळी चुकल्याने एक जण बचावला.

दुसरी घटना -

लोहियानगर भागात जुन्या वादातून तीन हल्लेखोरांनी ओम्या गायकवाड या तरुणावर गोळीबार केला. आरोपींनी ओम्यावर गोळी झाडली; मात्र सुदैवाने गोळी चुकल्याने तो बचावला. ही घटना सायंकाळी साडेसहा वाजण्याच्या सुमारास घडली. या दोन्ही प्रकरणांत खडक पोलिस ठाण्यात गुन्हा दाखल झाला. या घटनेतील फरारी आरोपींचा पोलिस शोध घेत पोलिसांनी त्यांना ताब्यात घेतले.

त्यानंतर त्याचे साथीदार जय उर्फ पियुष अनिल परदेशी (वय २२), सोनू उर्फ मॉन्टी अनिल परदेशी (वय २९, रा. कासेवाडी), विकी राजू परदेशी (वय ३५, रा. मार्केट यार्ड) आणि नितेश उर्फ बॉबी संतोष रिकीबे (वय २०, रा. घोरपडे पेठ) या संशयित आरोपींनाही अटक केली. आरोपींची पोलिसांकडून चौकशी सुरू आहे.