पिंपरी : मुंबईच्या धारावीत महिलेवर गोळीबार झाल्याची घटना ताजी असताना पिंपरीमध्येही गोळीबाराची घटना घडली आहे. पिंपरीतील मार्केटमध्ये दिवसाढवळ्या गोळीबाराची घटना घडली. गोळीबाराच्या घटनेने परिसर हादरून गेला आहे. पुणे आणि पिंपरी-चिंचवडमध्ये वाढलेल्या गोळीबाराच्या घटनेने कायदा सुव्यवस्थेचा प्रश्न निर्माण झाला आहे.

मिळालेल्या माहितीनुसार, पुणे जिल्ह्यातील पिंपरी मार्केटमध्ये गोळीबार झाल्याची घटना उघडकीस आली आहे. अज्ञात गुन्हेगारांनी दुचाकीवरून येऊन व्यापारावर गोळीबार झाला आहे. अज्ञात गुन्हेगारांनी केलेल्या गोळीबारात व्यापारी जखमी झाला आहे. या घटनेची माहिती मिळताच पिंपरी पोलीस घटनास्थळी पोहोचली.

वर्दळीच्या ठिकाणी गोळीबार

पिंपरी मार्केटमध्ये वर्दळीच्या ठिकाणी असलेल्या किराणा दुकानदारावर गोळीबार करण्यात आला. या गोळीबाराने आजूबाजूच्या इमारतीमध्ये राहणाऱ्या लोकांमध्ये भीती पसरली आहे. गोळीबाराच्या घटनेनंतर लोकांची एकच धावाधाव झाली. काहींनी गोळीबाराची माहिती पोलिसांना दिली. त्यानंतर पोलीस घटनास्थळी पोहोचले. पोलिसांनी या प्रकरणी गुन्हा नोंदवून तातडीने तपास सुरु केला आहे.

नेमकं काय घडलं?

भावेश कंकरानी असे वीस वर्षीय व्यापाऱ्याचे नाव आहे. भावेशवर गोळीबार करून गुन्हेगारांनी त्याच्या गळ्यातील सोन्याच्या ऐवज देखील पळवला. या गोळीबारात भावेश कंकरानी गंभीर जखमी झाला आहे. त्याच्यावर पिंपरीतील एका खासगी रुग्णालयात उपचार करण्यात येत आहेत.

घटनेची माहिती मिळताच पिंपरी चिंचवड पोलीस दलातील वरिष्ठ अधिकारी घटनास्थळी दाखल झाले आहेत. मात्र भरदिवसा बाजारपेठेत व्यापारी तरुणावर गोळीबार झाल्याने परिसरातील नागरिकांमध्ये दहशत निर्माण झाली आहे. व्यापारी तरुणावर गोळीबार करणाऱ्या आरोपीला पोलिसांनी तात्काळ अटक केली आहे. गोळीबार करणाऱ्या आरोपीवर कठोरात कठोर कायदेशीर कारवाई करावी, अशी मागणी परिसरातील स्थानिक नागरिकांनी तसेच व्यापाऱ्यांनी केली आहे.