अक्षय बडवे

Pune Crime News:

पुण्यातून धक्कादायक घटना समोर आली आहे. घरासमोर दुचाकीचा जोरात हॉर्न वाजवून झोपमोड केल्यामुळे भाडेकरूने घरमालकाची हत्या केल्याची धक्कादायक घटना घडली आहे. पुण्यातील हडपसर रस्त्यावरील उरुळी देवाची परिसरात ही घटना घडली आहे. या घटनेने परिसरात एकच खळबळ उडाली आहे. (Latest Marathi News)

मिळालेल्या माहितीनुसार, घरासमोर दुचाकीचे जोरात हॉर्न वाजवून झोपमोड झाली, त्यानंतर भडकलेल्या भाडेकरुने थेट घरमालकाची हत्या केल्याची खळबळजनक घटना घडली आहे. भाडेकरूने मालकाची पाण्याच्या टाकीत बुडवून हत्या केल्याची घटना उघडकीस आली आहे.

या घटनेनंतर पुण्याच्या हडपसरमधील उरुळी देवाची परिसरात एकच खळबळ उडाली आहे. दादा ज्ञानदेव घुले असे हत्या झालेल्या घरमालकाचे नाव आहे. तर या हत्येप्रकरणी पोलिसांनी संतोष राजेंद्र धोत्रे या संशयितास अटक केली आहे.  ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

पोलिसांनी दिलेल्या माहितीनुसार, आरोपी धोत्रे हा घुले यांच्या चाळीत भाडेकरू आहे. सोमवारी दुपारी धोत्रे दारू प्यायल्यानंतर घरात झोपायला गेला. त्यावेळी घुले यांनी घरासमोर दुचाकीचा जोरजोराने हॉर्न वाजवला. त्यामुळे झोपमोड झाल्याने धोत्रेने दादा ज्ञानदेव घुले यांना मारहाण केली. त्यानंतर धोत्रेने पार्किंगमधील पाण्याच्या टाकीत बुडवून घुले यांची हत्या केली.

घुले रात्री उशिरापर्यंत घरी न आल्यामुळे कुटुंबीयांनी ते बेपत्ता झाल्याची पोलिसांत तक्रार दिली. त्यानंतर पोलीस चौकशीदरम्यान घुले आणि धोत्रे यांच्यात सोमवारी भांडण झाल्याची माहिती पोलिसांना मिळाली. त्यानंतर पोलिसांना दादा ज्ञानदेव घुले यांचा मृतदेह आढळला. पोलीस तपासात पुढे दादा ज्ञानदेव घुले यांची हत्या झाल्याचे उघड झाले. या प्रकरणाचा पुढील तपास लोणी काळभोर पोलीस करत आहेत.