सध्या राज्यात नगरपरिषद आणि नगरपंचायतीच्या निवडणुकांची मतदान प्रक्रिया पार पडतेय. यावेळी राज्यातील विविध भागांत वाद, मतभेद आणि तणावाची परिस्थिती पाहायला मिळत आहे. अशातच पुण्यातील फुरसु्ंगीमधून मोठा खळबळजनक प्रकार समोर आला आहे. फुरसुंगी नगरपरिषद नगराध्यक्ष पदासाठी उमेदवारी अर्ज दाखल केलेल्या आम आदमी पार्टीच्या उमेदवाराला एका अनोळखी व्यक्तीनं जीवघेणी धमकी दिली.

आम आदमी पार्टीचे उमेदवार यशवंत अरुण बनसोडे (वय वर्ष ४२) यांनी फुरसुंगी नगरपरिषदेत नगराध्यक्ष पदासाठी उमेदवारी अर्ज दाखल केला होता. आज फुरसुंगी नगरपरिषदेत निवडणूकीची मतदान प्रक्रिया पार पडत आहे. पोलिसांनी दिलेल्या माहितीनुसार, बनसोडे हे १ डिसेंबर रोजी सकाळी सासवड रोड रेल्वे स्टेशन परिसरातून त्यांच्या वाहनाने प्रवास करत होते.

त्याच वेळी एका अनोळखी व्यक्तीने त्यांना हात दाखवून त्यांची गाडी थांबवली. गाडी थांबवल्यावर तो व्यक्ती बनसोडेंच्य जवळ गेला. तसेच बनसोडे यांना निवडणुकीतून माघार घेण्याची धमकी दिली. यावरच न थांबता अनोळखी व्यक्तीनं, "माघार नाही घेतली तर तुमचा संतोष देशमुख करू" अशी धमकी दिली.

यानंतर बनसोडे यांनी पोलीस ठाण्यात धाव घेत अज्ञात व्यक्तीविरोधात तक्रार दाखल केली. बनसोडे यांच्या तक्रारीनुसार, त्या व्यक्तीच्या कमरेला लोखंडी शस्त्र लपवलेले होते. एवढेच नव्हे तर रेल्वे पटरीजवळ दुसरा एक अनोळखी व्यक्ती उभा असल्याचेही त्यांनी सांगितले. त्यांनी याबाबत पोलिसांना माहिती दिली. दरम्यान, राज्य निवडणूक आयोगाने फुरसुंगी उरुळी देवाची नगरपरिषदेची निवडणूक स्थगित केली आहे.