पुणे : पुण्यात महिला अत्याचाराच्या घटनांमध्ये चिंताजनक वाढ होत असून, अलिकडे एका ४० वर्षीय नराधमानं एका ३७ वर्षीय विवाहित महिलेला लग्नासाठी धमकावत लैंगिक अत्याचार केल्याची धक्कादायक घटना उघडकीस आली आहे. आरोपीनं अत्याचार केल्यानंतर त्याचे फोटो आणि व्हिडीओ काढले आणि ते तिच्या वडिलांना पाठवण्याची धमकी देत तिच्यावर मानसिक दबाव टाकला.

ही घटना बिबडेवाडी भागात घडली असून, पीडित महिलेने अखेर हिम्मत दाखवून बिबवेवाडी पोलीस ठाण्यात तक्रार दाखल केली. पोलिसांनी दिलेल्या माहितीनुसार, आरोपी नानासाहेब गेल्या दोन महिन्यांपासून पीडितेला वारंवार त्रास देत होता. त्याने तिला लग्न करण्यासाठी जबरदस्ती करत तिच्यावर मानसिक दबाव निर्माण केला. एके दिवशी आरोपीने पीडितेला धमकी दिली की, 'जर तू माझ्याशी लग्न केलं नाहीस तर मी तुझ्या कामाच्या ठिकाणी येऊन फिनेल पिऊन आत्महत्या करेन'. या धमकीनं घाबरलेली पीडिता आरोपीच्या गाडीत बसून लॉजवर गेली, जिथे त्याने तिच्यावर जबरदस्तीने लैंगिक संबंध ठेवले. त्यावेळी आरोपीने तिचे फोटो आणि व्हिडीओ काढले आणि पुढे याच गोष्टींचा आधार घेऊन तिच्यावर दबाव टाकू लागला की, ‘माझ्याशी लग्न कर नाहीतर हे फोटो तुझ्या वडिलांना पाठवेन.

या प्रकाराला कंटाळून पीडित महिलेनं अखेर बिबवेवाडी पोलीस ठाण्यात तक्रार दाखल केली. पोलिसांनी आरोपी नानासाहेबविरुद्ध विविध गंभीर कलमांखाली गुन्हा दाखल केला असून, पुढील तपास पोलीस निरीक्षक जाधव करत आहेत.