गेल्या काही दिवसात महिला आणि मुलींवरील अत्याचाराच्या घटनांनी महाराष्ट्रासह देश हादरून गेला आहे. एकामागून एक घटना समोर येतायेत. या घटना ताज्या असतानाच पुण्यात आणखी एक घटना समोर आली आहे. शाळकरी मुलींवर नातेवाईक तरुणाकडूनच लैंगिक अत्याचार करण्यात आल्याच प्रकार उघडकीस आला आहे. धक्कादायक म्हणजे त्या नराधमाने इंजेक्शन देऊन बेशुद्ध करून अत्याचार केले आहेत.

२ वर्षापूर्वी घडलेला भयानक प्रकार पिडीत मुलीने शिक्षकांना सांगितल्यानंतर हा प्रकार समोर आला आहे. शाळेतील सुरू असलेल्या गुड टच बॅड टच अभियानामुळे पीडित मुलीला धीर आला आणि तिने घडला प्रकार शिक्षकांना सांगीतला. याप्रकरणी पुण्यातील बंडगार्डन पोलीस ठाण्यात आता गुन्हा दाखल करण्यात आला आहे. आरोपी पीडित मुलीच्या नात्यातच असल्याची माहिती पोलिसांनी दिली आहे.

पोलिसांनी दिलेल्या माहितीनुसार, ही घटना दोन वर्षांपूर्वी घडली. त्यावेळी पीडित मुलगी इयत्ता सहावीत शिकत होती. आरोपी तरुणाने या मुलीला इंजेक्शन देऊन बेशुद्ध केले आणि तिच्यावर लैंगिक अत्याचार केला. ही घटना जर कोणाला सांगितली तर त्या ठिकाणचे फोटो व्हायरल करेन अशी धमकी सुद्धा त्याने दिली होती.

२ वर्षानंतर जेव्हा पीडित मुलगी ज्या शाळेत शिकतेय तिथे 'गुड टच बॅड टच' अभियानाचे आयोजन केले होते. या उपक्रमामुळे या मुलीला धीर आला आणि तिने समोर जाऊन शिक्षकांना दोन वर्षांपूर्वी आपल्यासोबत जे घडलं ते सांगितलं. शिक्षकांनीही या मुलीच्या कुटुंबीयांना माहिती दिली. त्यानंतर पीडित तरुणीच्या आईने पोलीस ठाण्यात धाव घेतली पोलिसांनी याप्रकरणी गुन्हा दाखल करून आरोपी तरुणाला अटक केली आहे.